Sex fugla hringur hjá Ólafíu í Malasíu

Ólafía Þórunn Kristinsdóttir spilaði stórvel á þriðja hring Sime Darby-mótsins í Malasíu. Mótið er hluti af LPGA-mótaröðinni.

Ólafía var á þremur höggum yfir pari eftir fyrstu tvo hringina en spilaði miklu betur í dag en á fyrstu tveimur keppnisdögunum.

Ólafía fékk alls sex fugla á hringnum í dag en aðeins tvo skolla.

Ólafía var komin í hóp 30 efstu kylfinga en skolli á lokaholunni þýddi að hún datt niður í 34.-40. sæti.

Það er samt mikil bæting því Ólafía var í 61.-65. sæti eftir fyrstu tvo hringina.

Mótinu í Malasíu lýkur á morgun.