Birkir Hólm lætur af störfum sem framkvæmdastjóri Icelandair

Birkir Hólm Guðnason, sem hefur verið framkvæmdastjóri Icelandair frá árinu 2008, hefur látið af störfum hjá félaginu samhliða breytingum sem stjórn Icelandair Group hefur ákveðið að gera á skipulagi samstæðunnar.

Þetta kemur fram í tilkynningu flugfélagsins til Kauphallarinnar í morgun. Þar segir að breytingarnar feli í sér að rekstur og starfsemi Icelandair Group og Icelandair verði samþætt þannig að einn forstjóri verði yfir báðum félögum og auk þess sem fjármálasvið félaganna verða sameinuð.

Forstjóri verður Björgólfur Jóhannsson og framkvæmdastjóri fjármála verður Bogi Nils Bogason. Þá verða IGS, sem sinnir flugþjónustu á Keflavíkurflugvelli, og Icelandair Cargo, hluti af Icelandair, en þessi félög hafa verið dótturfélög Icelandair Group.

Með breytingunni á að nást fram skýrari áhersla á kjarnastarfsemi Icelandair Group og er samþættingin sögð skref í átt að aukinni einföldun og hagkvæmni í rekstri.

Úlfar Steindórsson, stjórnarformaður Icelandair Group, segir í tilkynningu að breytingin sé liður í því að styrkja félagið enn frekar og skerpa á áherslum í rekstrinum.

„Flugstarfsemi félagsins vegur þyngst í rekstri og afkomu samstæðunnar og það er mikilvægt að skipulag félagsins endurspegli þá staðreynd. Félagið er í sterkri stöðu til að takast á við breytingar í rekstrarumhverfinu og nýta tækifæri sem gefast á mörkuðum félagsins. Breytingin styður við áframhaldandi sókn félagsins og gerir því kleift að sinna áfram þörfum viðskiptavina sinna á hagkvæman hátt með góða þjónustu að leiðarljósi.

Ég vil þakka Birki Hólm Guðnasyni fyrir gott starf sem framkvæmdastjóri Icelandair. Hann á stóran þátt í vexti og velgengni félagsins á undanförnum árum,“ segir Úlfar.