KSÍ fór gegn samkeppnislögum

Knattspyrnusamband Íslands, KSÍ, taldist brotlegt gegn reglum Samkeppniseftirlitsins þegar sambandið auglýsti sameiginlegt miðaverð á leiki Pepsi deildar karla síðasta sumar.

KSÍ greinir frá þessu á heimasíðu sinni þar sem sambandið greinir einnig frá sátt sem það hefur gert við Samkeppniseftirlitið vegna þessa máls.

Fyrir síðasta tímabil hækkaði miðaverð á leiki í Pepsi deild karla úr 1500kr í 2000kr.

Samkeppnislög, nánar tiltekið greinar 10. og 12., leggja bann við samningum og samþykktum á milli fyrirtækja og ákvörðunum samtaka fyrirtækja sem hafa það að markiði eða af þeim leiðir að komið sé í veg fyrir samkeppni, hún takmörkuð eða henni raskað.

KSÍ birti í handbók leikja viðmiðunarverð aðgöngumiða. Það hafi þó ekki átt að hafa í hyggju að raska samkeppni. Til þess að sættast við Samkeppniseftirlitið tók KSÍ ákvæðið úr handbókinni og var ný útgáfa handbókarinnar gefin út samdægurs og ákvörðunin var tekin, 24. maí síðastliðinn.

Þess til auka mun sambandið beita sér fyrir því að fjalla ekki um verð, verðþróun, viðskiptakjör eða önnir samkeppnisleg málefni aðildarfélaga sambandsins.