Birgitta er í skýjunum með viðbrögðin: „Gleðisprengja í hjartað“

„Miðasalan fór í gang klukkan tólf og þrjár mínútur yfir tólf var bara allt að seljast upp,“ segir söngkonan Birgitta Haukdal í samtali við Vísi en miðasalan á afmælistónleika Írafárs gerði allt vitlaust í í fyrradag. Hljómsveitin ákvað því að bæta við aukatónleikum seinna sama kvöld þar sem margir voru enn inn á miðasölusíðunni. Birgitta segist alls ekki hafa átt von á þessum viðbrögðum við tónleikunum.

„Ég trúði þessu bara ekki, ég eiginlega meðtók þetta ekki fyrr en í gær.“

Írafár heldur upp á 20 ára afmæli þann 2. júní 2018 í Hörpu en þetta er í fyrsta skipti í 12 ár sem hljómsveitin kemur saman. Uppselt er á fyrri tónleikana og miðasala á seinni gengur vel.

„Það er komið vel á veg og fer hver að verða síðastur til þess að ná sér í miða. Það er alveg dásamlegt að finna fyrir þessum góðu straumum og áhuganum á tónlistinni okkar í dag.“

Koma öll saman aftur

Margir deildu gleði sinni á samfélagsmiðlum í gær yfir því að vera komnir með miða. Hljómsveitin Írafár gaf á sínum tíma út plöturnar Allt sem ég sé, Nýtt upphaf og Írafár en fyrsta lagið þeirra kom út árið 2000.

„Þetta er bara alveg geggjað gaman og þvílík gleðisprengja í hjartað að fólk njóti þess að hlusta á tónlistina mans.“

Birgitta segir að það hafi komið á óvart hvað miðasalan fór hratt af stað en þau hafi ekki einu sinni verið byrjuð að auglýsa þá. Birgitta hefur verið dugleg að koma fram síðan Írafár hætti en þó meira á bak við tjöldin og ekki sungið Írafár lögin nema örsjaldan. Hún sló meðal annars í gegn á Fiskidögum á Dalvík og á Þjóðhátíð í Eyjum í sumar. 

„Þessar uppákomur hafa sennilega kitlað fólkið aðeins,“ segir Birgitta og hlær. Hún er einstaklega spennt fyrir því að flytja lögin aftur en aðdáendur geta átt von á skemmtilegum tónleikum.

„Það er gaman að segja frá því að Hanni trommarinn okkar sem hætti í bandinu á sínum tíma verður gestur á tónleikunum og mun að sjálfsögðu koma fram. Við erum öll ótrúlega spennt fyrir því. Það er því smá skraut ofan á kökuna að fá einn af upprunanum með okkur. Mér finnst það ótrúlega skemmtilegt.“

Fara aftur í dvala

Viðbrögðin við miðasölunni í gær sýna að Írafár á enn marga aðdáendur. „Ég fann það þegar ég var að taka þessi lög í sumar að ef einhver tími er til þess að gera þetta þá er það núna.“ Hljómsveitin er þó ekki byrjuð aftur og er því ekkert tónleikaferðalag framundan.

„Þetta verða bara einu tónleikarnir sem við höldum. Ef það kemur til þess að við gerum eitthvað meira þá verður það í mesta lagi sem atriði á stærri uppákomu næsta sumar, þó ekkert hafi verið ákveðið í þeim efnum. Eftir sumarið leggjumst við aftur í dvala.“

Birgitta hefur mörgu að fagna þessa dagana en hún gaf út fjórar barnabækur fyrir jólin og ein þeirra, Lára og jólin, er í 12. sæti bóksölulistans samkvæmt nýjustu sölutölum og er hún fjórða mest selda barnabókin.

„Alveg dásamlegt, ég get ekki haldið annað en gleðileg jól,“ segir Birgitta um þessar góðu viðtökur.