Skoða hvort Landhelgisgæslan eigi að koma meira að sjúkraflugi

Meta á hvort ávinningur sé af því að auka aðkomu Landhelgisgæslu Íslands að sjúkraflugi. Svandís Svavarsdóttir, heilbrigðisráðherra, hefur skipað starfshóp um málið og er honum ætlað að skila niðurstöðum um miðjan næsta mánuð.

Starfshópurinn mun meta mögulegan ávinning, faglegan og fjárhagslegan, af því að auka aðkomu gæslunnar að sjúkraflugi. Hvort sem það verði með þyrlum eða öðrum flugvélum. Hópurinn mun einnig meta aðra mögulega kosti þyrlusjúkraflugs, samkvæmt tilkynningu frá Velferðarráðuneytinu, meðal annars með hliðsjón af tillögum fagráðs um sjúkraflutninga sem kynntar voru í skýrslu í fyrra.

Í þeirri skýrslu fjallaði fagráðið um notkun á þyrlum hér á landi til að sinna flutningi á bráðveikum og slösuðum sjúklingum.

Formaður starfshópsins er Elsa B. Friðfinnsdóttir, sérfræðingur í velferðarráðuneytinu. Aðrir nefndarmenn eru Hjörtur Kristjánsson, framkvæmdastjóri lækninga á Heilbrigðisstofnun Suðurlands, Ólafur Gunnarsson, sérfræðingur í velferðarráðuneytinu, Sigurður Einar Sigurðsson, fulltrúi Sjúkratrygginga Íslands, Inga Þórey Óskarsdóttir, fulltrúi dómsmálaráðuneytisins, Sandra M. Sigurjónsdóttir, fulltrúi Landhelgisgæslu Íslands og Viðar Magnússon fulltrúi Fagráðs sjúkraflutninga.