Segir launakostnað hækka um fjórðung ef vinnuvikan verður stytt „með einu pennastriki“

Hannes G. Sigurðsson, aðstoðarframkvæmdastjóri Samtaka atvinnulífsins, segir að launakostnaður atvinnurekenda myndi hækka um 25 prósent ef vinnuvikan yrði stytt „með einu pennastriki,“ eins og hann orðar það, og vísar í frumvarp sem lagt hefur verið reglulega fyrir Alþingi og kveður á um að vinnuvikan verði stytt úr 40 stundum í 35. Hannes segir sjálfsagt að vinnuveitendur prófi sig áfram en segir miðstýrðar aðferðir við að stytta vinnuvikuna ekki eiga við.

Nokkuð hefur verið fjallað um styttingu vinnuvikunnar undanfarið og tilraunaverkefni Reykjavíkurborgar þar um sem hafa gefist vel ef marka má frásagnir starfsmanna og stjórnenda á þeim vinnustöðum sem tekið hafa þátt. Hannes ræddi þessi mál í Bítinu á Bylgjunni í morgun.

„Tilraunaverkefnin sem eru í gangi nú hafa það að yfirlýstu markmiði að fækka dagvinnustundum um eitthvað tiltekið. [...] Ég er mjög fylgjandi þessum tilraunaverkefnum en ég er ekki fylgjandi þessu markmiði að fara með einu pennastriki að stytta dagvinnuviku allra,“ sagði Hannes. Hann sagði SA fylgjandi því að auka sveigjanleika sem er bæði launafólki og fyrirtækjum til hagsbóta en stéttarfélögin verði að koma með í þá vegferð.

„Ekki sáttur við það að við séum alltaf að tala um að vinnuvikan sé 40 stundir“

„Við erum til dæmis með ákvæði í okkar kjarasamningum á almenna vinnumarkaðnum svokallaðan fyrirtækjaþátt sem til þess fallinn að breyta alls konar reglum sem eru í kjarasamningum og gera frávik frá þeim og fólk fái þá meira borgað eða minni vinnutíma en gallinn við þetta fyrirkomulag er að það er neitunarvald hjá stéttarfélaginu og það hefur ekki fengið mikla útbreiðslu þetta form,“ sagði Hannes. Dæmi væru um tregðu hjá stéttarfélögum til þess að heimila frávik frá kjarasamningi að sögn Hannesar.

Varðandi styttingu vinnuvikunnar með nýrri löggjöf, eins og því frumvarpi sem nú liggur fyrir þinginu, sagði Hannes að launakostnaðurinn myndi hækka um fjórðung ef fólk héldi áfram að vinna jafnlengi og áður. Aðspurður hvort ekki væri hægt að setja þak á það sagði Hannes svona „pennastriksaðferðir“ ekki eiga við.

„Það er sjálfsagt að menn þreifi sig áfram með því að hagræða hjá sér en þessi breyting á umgjörðinni hún getur ekki haft neitt annað í för með sér nema mikinn kostnaðarauka fyrir atvinnulífið.“

Þá sagði Hannes að honum þætti umræðan um styttingu vinnuvikunnar oft markast af ýmis konar upplýsingaskorti, vanþekkingu og misskilningi.

„Ég er til dæmis ekki sáttur við það að við séum alltaf að tala um að vinnuvikan sé 40 stundir. Hún er það ekki. Hún er 37 stundir að hámarki og hjá mörgum styttri. Eins og til dæmis í kjarasamningi SA og verslunarmanna þá er hún 36 og hálf eða 36 tímar og korter hjá sumum. En það er alltaf verið að tala um að það séu 40 stundir og þegar við erum að bera okkur saman við önnur lönd þá berum við alltaf saman þessar 40 og leggjum síðan eitthvað tiltekið magn af yfirvinnustundum ofan á, sem að ég tel að sé vegna ákvæðist í kjarasamningum að stórum hluta. Það eru 15 prósent af launagreiðslum í almenna atvinnulífinu eru yfirvinnugreiðslur á meðan það er nánast óþekkt til dæmis í Frakklandi,“ sagði Hannes en viðtalið í Bítinu má heyra í heild sinni hér fyrir neðan.