Fjórir í haldi eftir aðgerð sérsveitar í Bríetartúni

Þrír karlmenn og ein kona voru færð á lögreglustöð eftir aðgerðir sérsveitar ríkislögreglustjóra í Bríetartúni á tíunda tímanum í morgun. 



Jóhann Karl Þórisson, aðstoðaryfirlögregluþjónn á höfuðborgarsvæðinu, sagði í samtali við Vísi fyrr í morgun að sérsveitin hefði farið inn í íbúð við Bríetartún og tveir menn verið færðir niður á lögreglustöð.

Í framhaldinu barst tilkynning frá lögreglu þar sem kom fram að fjórir væru í haldi vegna málsins.

Lögreglan sagði í tilkynningu að hún hefði handtekið þrjá karla og eina konu sem grunuð eru um líkamsárás gegn annarri konu. Er grunur um að barefli hafi verið beitt í árásinni auk þess sem brotaþola hafi verið ógnað með hníf. Konan var flutt á slysadeild til aðhlynningar en áverkar hennar eru ekki sagðir alvarlegir. 

Í tilkynningu frá lögreglu kom fram að mennirnir yrðu yfirheyrðir síðar í dag. Þeir voru í annarlegu ástandi þegar þeir voru handteknir. 

Jóhann Karl sagði að grunur hefði verið um að einhver væri með hníf á sér í íbúðinni og þess vegna hefði verið óskað eftir aðstoð sérsveitar. 

Jóhann Karl sagði málið ótengt rassíu lögreglu í gær þar sem alls sjö menn voru handteknir á Ægisíðu og Grettisgötu.

Fréttin var uppfærð klukkan 11:54.