Féll til bana á sýningu Cirque du Soleil

Loftfimleikamaður fjölleikahússins Cirque du Soleil er látinn eftir að hafa fallið til bana á sýningu í Tampa Bay í Flórída.

Yann Arnaud, 38 ára Frakki, hafði tekið þátt í atriði sem fram fór hátt yfir gólfi leikhússins á laugardag. Hafði hann meðal annars sveiflað sér á milli reipa sem héngu úr loftinu þegar óhappið varð og hann hrapaði til jarðar. Arnaud var fluttur á sjúkrahús þar sem hann svo lést af sárum sínum.

„Öll Cirque du Soleil-fjölskyldan er í losti og miður sín,“ segir í yfirlýsingu fjölleikahússins, sem má lesa hér að neðan.

Fyrirtækið segist nú vinna að rannsókn málsins með þarlendum lögregluyfirvöldum. Næstu tveimur sýningum þess hefur verið aflýst.

Loftfimleikamaðurinn Arnaud hafði starfað með Cirque du Soleil í rúm 15 ár og er hans minnst með einskærum hlýhug af samstarfsmönnum.

Þetta er ekki í fyrsta sinn sem starfsmenn fjölleikahússins látast við störf sín. Það gerðist síðast árið 2013 í Las Vegas þegar annar loftfimleikamaður féll til jarðar. Þá fannst sonur stofnanda Cirque du Soleil látinn í desember árið 2016 eftir að hafa orðið undir lyftu sem notuð var í sýningum hópsins.

pic.twitter.com/L4oelKS8lT

— Cirque du Soleil (@Cirque) March 18, 2018