Leiguverð hækkar meira en íbúðaverð í mars

Vísitala leiguverðs á höfuðborgarsvæðinu hækkaði um 2,1 prósent í mars á sama tíma og fasteignaverð lækkaði um 0,1 prósent.

Þetta kemur fram í tilkynningu frá Íbúðalánasjóði en þar segir að árshækkun leiguverðs, samkvæmt þinglýstum leigusamningum, nemi nú 10 prósentum og er í fyrsta skipti síðan í nóvember 2014 meiri en árshækkun íbúðaverðs á höfuðborgarsvæðinu, sem mælist nú 7,7 prósent.

Upp úr miðju ári 2016 fór fasteignaverð á höfuðborgarsvæðinu að hækka hraðar en leiguverð en nú hefur hægt á íbúðaverðshækkunum. Í tilkynningunni kemur fram að of snemmt sé að segja til um hvert leiguverð stefni næstu misseri, en flestir eru sammála um að aukin ró sé að færast yfir húsnæðismarkaðinn.