Úrskurðaður í sex mánaða nálgunarbann grunaður um gróf brot

Landsréttur hefur staðfest úrskurð Héraðsdóms Reykjavíkur þar sem karlmanni var gert að sæta nálgunarbanni í sex mánuði. Lögreglustjórinn á höfuðborgarsvæðinu krafðist þess að maðurinn skyldi sæta nálgunarbanni því hann sé undir rökstuddum grun um ofbeldi, áreiti og ónæði gagnvart konu.

Héraðsdómur Reykjavíkur hafði dæmt manninn vegna þriggja ofbeldisbrota sem áttu sér stað árið 2016 og 2017.

Konan segir manninn hafa veist að henni með ofbeldi nú í maí mánuði þannig að hann hafi dregið hana upp stiga, þrengt að hálsi hennar með hálsmáli peysu hennar, neitað konunni að yfirgefa heimili hans, sest klofvega á konuna og hert að hálsi hennar svo að konan hafi upplifað að maðurinn væri að kirkja hana.

Sagði konan manninn hafa kýlt hana ítrekað í kvið þar til konan slapp út og náði að hringja eftir aðstoð lögreglu.

Var konan með áverka á hálsi sem eru sagðir staðfesta frásögn hennar, sem og fleiri áverka.

Konan sagði manninn hafa elt hana og núverandi kærasta hennar daglega og hann hafi sent henni mörg skilaboð. Því til staðfestingar lagði konan fram skjáskot af samskiptum þeirra í smáskilaboðum, en í greinargerð lögreglu kemur fram að af þeim gögnum verði ráðið að konan vilji forðast manninn og samskipti við hann, sem hann virði að vettugi.

Konan hefur lýst því að hún sé ofsahrædd við manninn og þori ekki út úr húsi nema athuga sérstaklega hvort hann sé nálægur.

Hjá lögreglu er enn fremur til meðferðar mál vegna meintrar líkamsárásar mannsins gegn konunni frá því í fyrra.

Konan hefur lýst því hvernig maðurinn ýtti henni með þeim afleiðingum að mjóbak hennar skall á eldhúsinnréttingu, kýlt hana í eyra og kjálka, hrint henni í stiga svo hún hafi rekið sköflung og hné í stigaþrep. Í gögnum málsins séu myndir lögreglu af áverkum brotaþola ásamt læknisvottorði sem staðfesti áverka sem samrýmist frásögn konunnar.