Fornspyrnan: Fúll og fullur Siglfirðingur uppljóstraði leyndarmáli

Siglufjörður er eitt stærsta bæjarfélag á Íslandi sem hefur aldrei átt lið í efstu deild karla í fótbolta. Svona byrjaði innslag Stefáns Pálssonar, Fornspyrnan, í Pepsimörkunum á Stöð 2 Sport í gærkvöld.

Árið 1963 tók Knattspyrnufélag Siglufjarðar þátt í Íslandsmótinu í fyrsta skipti. Félagið hóf leik í næstefstu deild og gekk vonum framar. 3. ágúst það ár lék liðið úrslitaleik við Þrótt um hvort liðið færi í efstu deild.

Heimamenn á Siglufirði unnu 4-2 eftir að hafa lent tveimur mörkum undir. Nokkrum dögum síðar kærði Þróttur úrslit leiksins. Kæran var vegna ólöglegs leikmanns, leikmaður í 3. flokki KS hafði tekið þátt í leiknum.

Á þessum árum þurfti sérstakar undanþágur fyrir leikmenn svo unga.

Sagan segir að Siglfirskur leikmaður sem ekki komst í liðið hafi verið svo sár yfir því að táningur hafi tekið pláss hans að hann blaðraði leyndarmálinu í gestina.

Þrótti var dæmdur sigur í leiknum og spilaði í efstu deild næsta tímabil á meðan Siglfirðingar sátu eftir.