Hælar víkja fyrir flatbotna skóm

Breytingar hafa orðið á kauphegðun kvenna á síðustu misserum samkvæmt sölutölum þar sem háhælaðir skór eru að víkja fyrir flatbotna skóm. Verslunareigandi segir að hælarnir hafi minnkað í þágu þæginda.

Í fyrra dróst sala á háhæluðum skóm saman um 12 prósent í Bandaríkjunum á meðan sala á strigaskóm og flatbotna skóm jókst um 37 prósent. Þróunin hefur víða verið verið svipuð og vísa ýmsir greininaraðilar í aukna áherslu á þægindi.

Þrátt fyrir þennan viðsnúning í skókaupum er enn víða hælaskylda líkt og hjá flugfreyjum íslensku flugfélaganna og á rauða dreglinum á kvikmyndahátíðinni í Cannes. En það vakti töluverða athygli í vikunni þegar leikkonan Kristen Stewart tók af sér hælana í mótmælaskyni og gekk berfætt upp dregilinn.

Verslunareigandi telur þróunina hafa verið svipaða á Íslandi. „Við erum búin að vera sjá þetta undanfarin þrjú til fjögur ár að strigaskórnir eru á hraðri uppleið. Hælaskórnir hafa í rauninni verið að minnka en við seljum alltaf hælaskó fyrir vissan hóp kvenna sem vilja alltaf vera á hælum þegar þær fara eitthvað fínt," segir Svava Johansen, eigandi NTC.

Hún segir þróunina hafa byrjað meðal yngri kynslóðarinnar en smitað út frá sér. Þessu verði líklega erfitt að snúa við. „Strigaskór og flatbotna skór eru svo þægilegir að það er oft svolítið erfitt fyrir konu að snúa við þegar hún hefur komið sér upp fataskáp og skóm í stíl, sem eru þægilegir, að fara síðan í einhverja óþægilega. Þannig mér finnst mörg merki vera að huga að þessu," segir Svava.