Al­var­legt um­ferðar­slys á Kjalar­nesi

Mjög alvarlegt umferðarslys varð á Kjalarnesi við Saltvík á áttunda tímanum í kvöld.

Mikill fjöldi viðbragðsaðila var kallaður út vegna slyssins en alls voru tíu manns í bílunum tveimur sem lentu í slysinu. Voru þeir allir fluttir á slysadeild í Reykjavík með mismikil meiðsli samkvæmt upplýsingum frá lögreglu á vettvangi. Björgunarsveitir og slökkviliðsmenn eru enn við vinnu á vettvangi. 

Vesturlandsvegi var lokað við Þingvallaafleggjara og að Hvalfjarðarvegi vegna slyssins en hann var opnaður aftur skömmu fyrir klukkan 22. 

Tilkynning barst vegna slyssins klukkan 20:05 frá lögreglunni:

Kl. 19:23 barst tilkynning um alvarlegt umferðarslys á Vesturlandsvegi skammt frá Enni á Kjalarnesi. Vesturlandsvegurinn er lokaður frá Þingvallavegi og að Hvalfjarðarvegi. Hjáleið er um Kjósarskarðsveg.

Viðbragðsaðilar eru komnir á staðinn.

Búist er við að vegurinn verði lokaður í nokkurn tíma. Lögreglan á höfuðborgarsvæðinu fer með málið en þess er óskað að fjölmiðlar hringi ekki í þá fyrst um sinn því þeir eru uppteknir.

Í myndbandinu hér fyrir neðan má sjá þar sem einn af sjúkrabílunum sem sendir voru á vettvang ekur á forgangi inn til Reykjavíkur en sex sjúkrabílar sem sendir voru á vettvang hafa ekið á forgangi inn til Reykjavíkur með slasaða. 

Í myndbandinu hér fyrir neðan má sjá þar sem lögreglumenn á mótorhjólum fara til aðstoðar á vettvangi núna á níunda tímanum. 

Fréttin var uppfærð klukkan 21:54.