Hefur aldrei hitt Harry tengdason sinn og þurfti að kalla hann „H“

Thomas Markle, faðir Meghan Markle, var í einkaviðali í IVT þættinum Good Morning Britain í dag um dóttur sína, samband sitt við Harry prins og að missa af konunglega brúðkaupinu. Í viðalinu talaði hann einstaklega fallega um dóttur sína.

„Ég er mjög stoltur af henni,“ sagði Thomas um Meghan. Hann sagði einnig að hún hafi verið prinsessan sín frá því hún fæddist.

Þurfti að kalla hann „H“

„Pabbi ég er kominn með nýjan kærasta,“ var það fyrsta sem Thomas heyrði frá dóttur sinni um Harry. Í næsta símtali sagði hún að hann væri breskur en í því þriðja sagði hún „Hann er prins.“

Thomas sagði í viðtalinu að Meghan hafi þá sagt að þetta væri Harry en að þau þyrftu að tala um hann sem „H“ svo enginn kæmist að þessu, enda var samband þeirra ekki komið í fjölmiðla á þessum tímapunkti.

Thomas sagði í viðtalinu að það hafi verið Meghan sem sagði honum fyrst frá því að það væri konunglegt brúðkaup í vændum. Hann hafi svo rætt við Harry í síma og þar hafi prinsinn beðið um hans „blessun“ fyrir því að giftast Meghan. Sagðist hann hafa svarað:

„Þú ert herramaður, lofaðu að vera góður við dóttur mína og þú færð mitt samþykki.“

Klökknaði við að ræða myndirnar

Rétt fyrir brúðkaupið kom upp ljósmyndahneyksli í kringum Thomas sem þótti varpa skugga á konunglega brúðkaupið. Thomas Markle ætlaði að gera tilraun til að bæta ímynd sína í breskum blöðum og var því ráðinn paparazzi-ljósmyndari til að taka myndir af honum og dreifa til fjölmiðla sem greiddu fyrir þær háar fjárhæðir. Þegar upp komst að myndatökurnar hefðu verið sviðsettar olli það miklu fjaðrafoki.

„Ég ætlaði að bæta ímynd mína en augljóslega fór það allt til fjandans og mér líður illa yfir því.“

Í viðtalinu viðurkenndi Thomas að myndirnar hefðu verið „mistök.“ Hann hafi beðið bæði Harry og Meghan afsökunar á myndunum og tók það fram að þau hefðu fyrirgefið sér.

„Það er erfitt að taka þetta til baka.“

Thomas varð klökkur við að ræða þetta en sagðist nú vera að venjast fjölmiðlaathyglinni. Harry og Meghan ráðlögðu honum að fara varlega og „tala ekki við fjölmiðla“ í aðdraganda brúðkaupsins en vildu ennþá hafa hann með á stóra daginn.

„Harry sagði mér að vinur hans úr hernum myndi hugsa um mig meðan ég væri þar. Þetta var allt skipulagt og þetta var allt í góðu lagi.“

Aldrei hitt Harry

Thomas segir að það hafi verið mikil leynd í kringum brúðkaupsundirbúninginn, líka varðandi fötin og skóna sem faðir brúðarinnar átti að klæðast.

„Ég átti að fara í mátanir í Los Angeles, í Beverly Hills, undir öðru nafni.“

Í viðtalinu kom í ljós að Thomas hefur aldrei hitt tengdason sinn í eigin persónu og aðeins talað við hann í síma. Thomas hefur verið búsettur í Mexíkó undanfarin sex ár. Hann átti að fylgja dóttur sinni upp að altarinu en þar sem hann þurfti að fara í hjartaaðgerð þremur dögum fyrir brúðkaupið, gekk það ekki upp.

„Þau voru vonsvikin,“ sagði Thomas um viðbrögð brúðhjónanna við að heyra að hann kæmist ekki í brúðkaupið þeirra. „Meghan grét.“ Hann sagðist hafa beðið þau að hafa ekki áhyggjur af sér, heldur ættu þau að hugsa um brúðkaupið og brúðkaupsferðina.

„Þau sögðu að það væri mikilvægast að ég næði bata.“

Neðanmálsgrein í brúðkaupi dóttur sinnar

Þess í stað gekk Meghan ein hálfa leið inn kirkjugólfið og svo fylgdi Karl bretaprins henni síðasta spölinn. Thomas segir að það hafi verið heiður og að hann væri honum þakklátur en sagðist þó aldrei hafa talað við hann.

„Ég get ekki hugsað mér neinn betri í minn stað en Karl prins. Hann var mjög myndarlegur og dóttir mín var falleg með honum.“

Hann viðurkenndi þó að hafa verið öfundsjúkur, enda ætlaði hann sér að vera á staðnum. Sagðist hann hafa horft á brúðkaupið, grátið og verið „mjög stoltur“ af dóttur sinni en á sama tíma svekktur.

„Það er óheppilegt að ég sé nú aðeins neðanmálsgrein í einu af stærstu augnablikum sögunnar í stað þess að vera faðirinn sem fylgdi henni upp að altarinu.“