Pepsi-mörkin: „Átakanlegt“ að horfa á Viðar Ara í Kópavoginum

Viðar Ari Jónsson, hægri bakvörður FH, fékk væna útreið frá Frey Alexanderssyni, sérfræðingi Pepsi-markanna, á Stöð 2 Sport HD í gærkvöldi fyrir frammistöðu sína í 4-1 tapi FH á móti Breiðabliki.

Viðar átti í miklu basli með að koma fyrirgjöfum inn á teiginn og þegar að þær loksins bárust voru þær skelfilegar, að mati Freys.

„Viðar Ari komst ótt og títt í fyrirgjafarstöður í þessum leik en þær voru skelfilegar og í heildina í sumar hafa þær verið afar daprar,“ sagði Freyr.

„Hann eyðilagði svo margar sóknir með lélegum fyrirgjöfum karlgreyið að það var átakanlegt að horfa á þetta ef ég á að vera hreinskilinn. Svo endar þetta á fyrirgjöf sem á heima í 2. deildinni.“

Reynir Leósson tók undir orð Freys og benti á að Viðar, sem er á láni frá toppliði norsku úrvalsdeildarinnar, Brann, verður að gera betur í þessu sem bakvörður.

„Þetta er strákur sem fór í frábært lið í atvinnumennskunni. Ef menn ætla að ná árangri þar þurfa þeir að vera með þetta í miklu betra lagi,“ sagði Reynir Leósson.

Greiningu Freys má sjá hér að ofan.