Hagnaður Lex jókst um ríflega þriðjung

Hagnaður Lex, einnar stærstu lögmannsstofu landsins, nam 225 milljónum á síðasta ári, samkvæmt nýbirtum ársreikningi stofunnar, og jókst um 36 prósent frá fyrra ári þegar hann var 166 milljónir króna.

Rekstrartekjur lögmannsstofunnar námu liðlega 1.165 milljónum króna í fyrra og jukust um 10 prósent frá árinu 2016 þegar þær voru 1.051 milljón. Rekstrargjöldin voru ríflega 893 milljónir og hækkuðu um 57 milljónir króna á milli ára. Þar af námu laun og launatengd gjöld 665 milljónum króna, sem er 11 milljóna aukning frá fyrra ári, en 45 manns störfuðu á lögmannsstofunni á síðasta ári.

Í hópi eigenda Lex eru meðal annars hæstaréttarlögmennirnir Arnar Þór Stefánsson, Helgi Jóhannesson og Kristín Edwald.