Níutíu flúrarar fylla Laugardalshöll

„Fólk má búast við að kynnast menningunni á bakvið húðflúr á allt öðru leveli, þetta er í raun risastór myndlistasýning með ótrúlega flottum listamönnum víðsvegar að í heiminum sem lifa og þrífast fyrir ástríðunni á þessari listgrein,“ segir Málfríður Sverrisdóttur hjá Tattoo & Skart sem stendur fyrir sem The Icelandic Tattoo Expo í Laugardalshöllinni dagana 31. ágúst – 2. september.

Sýningin í ár verður sú stærsta sem haldin hefur verið og koma fram yfir níutíu húðflúrarar.

„Hápunkturinn hefur yfirleitt verið laugardagskvöldið, þá fer fram svokölluð pin-up búningakeppni sem er ótrúlega gaman að fylgjast með. Öllum er frjálst að taka þátt óháð aldri og kyni. Þáttökugjald er ekkert og hægt að kynna sér það betur á Facebook.“

Málfríður segir að fjölmargir panti sér tími í flúr á hátíðinni með löngum fyrirvara.

Sjötta hátíðin

„Þá er fólk búið að kynna sér listamennina sem þeim líst vel á og aðrir mæta bara á staðinn með hugmyndir af stóru flúrum,“ segir Málfríður og bætir við að sumir taki síðan skyndiákvörðun þegar á staðinn er komið og fá sér eitthvað lítið og sætt.

„Þessi viðburður núna í ár sá stærsti sem haldinn hefur verið í þessum bransa á Íslandi og erum við með níutíu listamenn, mestmegnis erlendis frá. Flestar löggildar húðflúrstofur á Íslandi taka einnig þátt.“

Hátíðin er haldin í sjötta skiptið og segir Margrét að alltaf hafi verið góð stemning.

„Og allir hæstánægðir með komu sína, bæði artistar og gestir. Við höfum verið staðsett í súlnasalnum á Hótel Sögu hingað til en ákváðum að stækka við okkur í ár með því að færa okkur í Laugardalshöllina vegna mikillar aðsóknar á hátíðina.“