Bæði frá­skilin, kynntust á Facebook og nú gift: „Þetta var ást við fyrsta orð“

Vala Matt fór í ævintýraleiðangur þar sem hún ræddi við hjón sem kynntust á Facebook.

Fyrirsætan og snyrtifræðingurinn Heiðdís Steinsdóttir samþykkti vinabeiðni á Facebook frá manni sem hún þekkti ekki neitt, Almari Eiríkssyni framkvæmdastjóra, og við það breyttist allt hennar líf.

Í dag eru þau yfir sig ástfangin og hamingjusamlega gift.

„Einn daginn fékk ég vinabeiðni. Við áttum alveg þónokkra sameiginlega vini og því samþykkti ég hann sem vin minn,“ segir Heiðdís í þættinum Ísland í dag á Stöð 2 í gærkvöldi.

„Svo svona vika seinna fæ ég skilaboð og hann byrjar á því að þakka mér fyrir að samþykkja sig sem vin og spyr mig hvort ég væri til í smá spjall. Ég hugsaði bara já, af hverju ekki. Ég svaraði honum játandi en vildi nú bara létt spjall.“

Varð alltaf alvarlegra

Heiðdís segir að með tímanum hafi spjallið undið upp á sig og orðið alvarlegra og alvarlegra.

„Ég ákvað að senda og sé ekki eftir því. Hún var svolítið treg í fyrstu, en þetta gekk og við spjölluðum og spjölluðum,“ segir Almar.

„Við spjölluðum saman á messenger í um einn mánuð þar til að hann fór í veiði með vinum sínum. Þá sagði ég honum að hann mætti fá símanúmerið mitt og gæti hringt þegar hann væri kominn inn í hús eftir veiði dagsins,“ segir Heiðdís og Almar hringdi síðan um kvöldið og var það í fyrsta skipti sem þau töluðu saman í síma.

„Við töluðum saman í tvo þrjá klukkutíma og það var einhver fótboltaleikur í gangi og hann mátti sko ekkert vera að því að horfa á leikinn og drengirnir sem voru með honum voru bara látnir bíða. Svo kom hann í bæinn og þá var kominn tíma til að við myndum hittast í fyrsta skipti. Við hittumst í grasagarðinum á Kaffi Flóru.“

Ég á ekki séns 

„Ég sá bara þetta yndislega fallega bros sem kom á móti mér. Ég hugsaði með mér, nei ekki séns,“ segir Almar sem taldi að hann ætti ekki möguleika í svona flotta konu. Þetta væri 1. deildin.

„Við sátum þarna í fjóra klukkutíma og töluðum og töluðum. Maður varð alltaf meira og meira heilluð. Maður fann það og sá að skrifin áttu alveg við það sem maður var að hitta og tala við. Svo hittumst við daglega eftir það. Ég var að fara út til útlanda eftir tvo mánuði og hugsaði fljótalega, æji ég bíð honum bara með,“ segir Heiðdís en saman fóru þau til Alicante á Spáni. Heiðdís rifjar upp yndislega göngu við ströndina á Spáni.

„Þegar við erum komin út að enda við tangann fer minn bara niður á hné og segist ekki hafa undirbúið þetta neitt en biður mig bara um að giftast sér. Ég sagði bara strax já, en ekki hvað. Allir sem stóðu í kring klöppuðu og var þetta eins og í bíómynd.“

„Þetta var ást við fyrsta orð. Þegar við hittumst var eins og við hefðum þekkst lengi,“ segir Almar.

Eftir þriggja mánaða samband voru þau orðin trúlofuð og farinn að búa saman. Tveimur árum síðar giftu þau sig á Akureyri. Sjáið þessa dásamlegu ástarsögu hér að neðan.