Advania kaupir Wise

Hugbúnaðarfyrirtækið Advania hefur fest kaup á fyrirtækinu Wise, þar sem starfa um 80 sérfræðingar í hugbúnaðargerð, ráðgjöf og þjónustu. Fram kemur í tilkynningu frá Advania að enn sé þó beðið eftir því að Samkeppniseftirlitið leggi blessun sína yfir kaupin.

Wise var áður í eigu AKVA group í Noregi en fyrirtækinu er lýst sem stórtækum söluaðila á Microsoft Dynamics NAV bókhalds- og viðskiptahugbúnaðinum. Wise hafi einnig sérhæft sig í lausnum fyrir sveitarfélög, sjávarútveg, fjármál og ýmiskonar sérfræðiþjónustu.

Stjórnendur Advania vona að með kaupunum verði til „eining sem hefur alla burði til að keppa við alþjóðleg fyrirtæki á þessum markaði,“ enda starfi hjá Advania sérfræðingar í Microsoft Dynamics NAV - rétt eins og hjá Wise.

Haft er eftir Ægi Má Þórissyni, forstjóra Advania á Íslandi, í tilkynningunni að mikil tækifæri felist í þessari sameiningu. „Lausnaframboð Wise fellur mjög vel að lausnaframboði Advania og við getum nýtt þekkingu og stærð okkar til að þjónusta fleiri atvinnugreinar. Upplýsingatæknibransinn er að ganga í gegnum miklar breytingar og með sameiningunni sjáum við fyrir okkur að geta stóreflt þjónustu við viðskiptavini, bæði hér á landi og erlendis. Við erum tilbúin í sókn á alþjóðamarkaði og sameiningin styrkir okkur svo um munar í alþjóðlegu samkeppnisumhverfi,“ segir Ægir.

Í tilkynningunni tekur Kristinn Eiríksson, framkvæmdastjóri viðskiptalausna Advania, í sama streng. „Wise hefur náð glæsilegum árangri bæði hér heima og út fyrir landsteinana sem er ekki síst að þakka frábæru starfsfólki sem býr yfir mikilli reynslu og þekkingu. Við hlökkum til að fá þau til liðs við okkur. Eftir sameiningu verður Advania með um 200 starfsmenn sem sérhæfa sig í viðskipta- og framleiðnilausnum Microsoft og því með burði til að þróa áfram frábærar lausnir og veita fyrirmyndar þjónustu,“ segir Kristinn.

Helstu vörutegundir Wise eru NAV í áskrift, Wise Analyzer greiningartól, sveitarfélagalausnir og aðrar viðskiptalausnir. Meðal þeirra er WiseFish, sérhönnuð lausn fyrir sjávarútveg.