WOW lauk 60 milljóna evra fjármögnun

Skuldabréfaútboði WOW air lauk í dag. Stærð skuldabréfaflokksins nemur 60 milljónum evra, þar af 50 milljónir evra sem þegar hafa verið seldar og 10 milljónir evra sem verða seldar fjárfestum í framhaldi af útboðinu.

Þetta kemur fram í fréttatilkynningu frá WOW air. Þar segir jafnframt að bréfin verði gefin út með rafrænum hætti í Værdipapirsentralen ASA í Noregi og verða í kjölfarið skráð til viðskipta í Nasdaq kauphöllinni í Stokkhólmi. Þátttakendur voru bæði innlendir og erlendir fjárfestar.

„Við þökkum fyrir þann mikla stuðning sem félagið hefur fengið í gegnum þetta ferli sem og öllum þeim sem tóku þátt í útboðinu. Niðurstaðan er okkur hjá WOW air mikil hvatning til að halda áfram okkar góða starfi og efla enn frekar alþjóðlegt flug og ferðaþjónustu hér á landi“ segir Skúli Mogensen forstjóri og stofnandi WOW air.

Skuldabréfin verða gefin út til þriggja ára og eru þau tryggð með veði í öllum hlutabréfum í WOW Air og dótturfélögum þess. Nafnverð hvers bréfs nemur 100.000 evrum, jafnvirði 13 milljóna króna og ber það 3 mánaða Euribor-vexti (-0,319 prósent) auk vaxtaálags sem áður hefur verið upplýst um að verði 9 prósent.

Sjá einnig: Skúli vill allt að 33 milljarða innan átján mánaða

Greint var frá því á föstudag að félagið hefði náði að tryggja sér hið minnsta 50 milljónir evra, eða sem nemur 6,4 milljörðum króna, í útboðinu. Fjármögnun WOW hafi því verið tryggð fyrir helgi, en lagt var upp með það að safna að lágmarki 50 milljónum evra þegar ráðist var í útboðið fyrir um mánuði.

Heimildir herma að bandarískur fjárfestingarsjóður hafi skráð sig fyrir um 10 milljónum evra í útboðinu. Þá hafi norska verðbréfafyrirtækið Pareto Securities, sem annaðist skuldabréfaútboðið fyrir WOW, tryggt fjármagn frá erlendum fjárfestum fyrir um 35 milljónir evra.

Skuldabréfaútgáfan er hugsuð sem brúarfjármögnun fram að áformuðu frumútboði WOW air innan næstu 18 mánaða. Þá hyggst flugfélagið sækja sér nýtt hlutafé og yrði í kjölfarið skráð á markað en í dag er Skúli Mogensen, forstjóri WOW air, eini hluthafi félagsins. Skúli sagði í samtali við fjölmiðla um helgina að stefnan væri sett á WOW myndi sækja sér allt að 300 milljónir dollara, um 33 milljarða króna, í hlutafjárútboðinu.

Fréttin verður uppfærð