Pedersen tekur fram úr Hilmari Árna á fleiri sviðum

Eftir að leiða kapphlaupið um markakóngstitilinn og gullskóinn í Pepsi-deild karla í fótbolta nánast í allt sumar er Hilmar Árni Halldórsson, leikmaður Stjörnunnar, að missa þann titil í hendur danska framherjans Patricks Pedersens, leikmanns Vals.

En, það er ekki eini titilinn sem að hann virðist vera að missa í hendur Danans því Pedersen er nú, þegar að tveimur umferðum er ólokið, búinn að koma að fleiri mörkum með beinum hætti (mark eða stoðsending) heldur en Hilmar Árni.

Hilmar Árni hefur kólnað mikið í markaskorun undanfarnar vikur en er engu að síður búinn að skora fimmtán mörk. Hann stefndi hraðbyri að markametinu í júlí en nú virðist ólíklegt að hann nái 19 mörkum.

Patrick Pedersen komst upp fyrir Hilmar Árna í síðasta leik með þrennu á móti ÍBV og er búinn að skora 16 mörk. Hann vantar þrjú mörk í metið og fær útileik gegn FH og ansi girnilegan heimaleik gegn löngu föllnu liði Keflavíkur í lokaumferðinni til þess að jafna eða bæta markametið.

Hilmar Árni er búinn að gefa fimm stoðsendingar til viðbótar við mörkin fimmtán og hefur því komið með beinum hætti að 20 mörkum Stjörnunnar. Hann var þremur mörkum plús stoðsendingum á undan Patrick Pedersen á þeim lista fyrir síðustu umferð en Hilmar hvorki skoraði né lagði upp í leik Stjörnunnar gegn KA í gærkvöldi.

Patrick Pedersen skoraði ekki bara þrjú mörk á móti ÍBV heldur lagði hann upp eitt fyrir Kristinn Frey Sigurðsson. Hann kom því að fjórum mörkum Vals með beinum hætti og fór úr 17 mörkum plús stoðsendingum í 21 og er kominn upp fyrir Hilmar Árna.

Enginn ógnar þeim tveimur en Pálmi Rafn Pálmason, KR, er þriðji á listanum með ellefu mörk og fjórar stoðsendingar en ValsmaðurinnKristinn Freyr Sigurðsson er fjórði fjórtán sköpuð mörk (7 mörk + 7 stoðsendingar). Pedersen og Hilmar Árni munu því berjast um markakóngstitilinn og á listanum yfir sköpuð mörk í lokaumferðunum tveimur.

Stjarnan á eftir útileik gegn ÍBV á sunnudaginn og svo heimaleik í lokaumferðinni á móti FH.

Mörk + stoðsendingar í Pepsi-deildinni 2018:

Patrick Pedersen, Val -  21 (16+5)

Hilmar Árni Halldórsson, Stjörnunni - 20 (15+5)

Pálmi Rafn Pálmason, KR - 15 (11+4)

Kristinn Freyr Sigurðsson, Val - 14 (7+7)