Stærðarinnar snákur féll úr loftinu í banka í Kína

Starfsfólk banka í Nanning í Kína brá heldur í brún þegar stærðarinnar snákur datt úr loftinu á miðjum starfsmannafundi á föstudaginn. Þau voru komin saman áður en bankinn opnaði til að ræða daginn þegar snákurinn datt úr loftinu og lenti á konu.

Í fyrstu virtist sem að hvorki fólkið né snákurinn áttaði sig á því hvað var að gerast. Fólkið var þó ekki lengi að sjá hvað hefði lent meðal þeirra og hljóp á brott. Snákurinn leitaði sér skjóls á bakvið sófa.

Um verndaða snákategund er að ræða, samkvæmt ChinaNews, og var hann um fimm kíló að þyngd. Starfsmenn borgarinnar komu starfsfólki bankans til bjargar og fjarlægðu snákinn.

Atvikið náðist á öryggismyndavélar og hefur myndbandið notið mikillar athygli.