„Allt sem við gerum á netinu er kortlagt“

Allt sem fólk setur inn á Facebook er rýnt af öðrum og smáforrit sem við hlöðum inn í símann okkar getur verið í samstarfi við hundruð annara fyrirtækja sem þýðir að öll fyrirtækin eru þá komin með upplýsingar um snjallsíman viðkomandi. Þetta segir forstjóri Persónuverndar um leið og hann brýnir fyrir fólki að vera vakandi og vita hvaða aðgang fólk leyfir að sér.

Starfsmenn Persónuverndar hafa verið á ferð um landið síðustu vikur og haldið kynningarfundi á nokkrum stöðum, m.a. á Selfossi, þar sem farið er yfir nýja persónuvendarlöggjöf sem byggð er á reglugerð Evrópusambandsins og tók gildi hér á landi 15. júlí síðastliðinn. Helga Þórisdóttir, forstjóri Persónuverndar kom víða við í sinni framsögu.

„Allt sem við gerum á netinu er kortlagt og þá er ég að tala um að hvert einasta músaklikk semvið framkvæmum  - það er skráð í gagnabanka. ef við leitum eftir gögnum á internetinu þá veit alltaf einhver af því þannig að viðskiptamódel internetsins og margra fyrirtækja hefur verið að selja persónuupplýsingar og það eru dæmi um það að eitt smáforrit sem við hlöðum niður í snjallsímann okkar að það fyrirtæki getur verið í samstarfi við tvö hundruð önnur fyrirtæki,“ segir Helga.

Helga talaði líka um nettengt leikföng t.d. í svefnherbergjum fólks sem eru farin að nema samtöl og það sem gerist þar inni.

„Málið er það að mikið af þessum nettengdu tækjum eru nær ekkert varin fyrir aðgangi annarra og ef við hugum ekki að því að breyta lykilorðum og lágmarks öryggisráðstöfunum þá eru heimilin okkar og margt annað komin í beina útsendingu,“ segir Helga.

Þá bendir Helga á að íslenskt öryggisfyrirtæki gerði nýverið könnun þar sem kom í ljós að um 700 opnar vefmyndavélar voru frá íslenskum heimilum, meðal annars.