Leó Snær fær leikbann fyrir brotið á lokasekúndunum í Iðu

Stjörnumaðurinn Leó Snær Pétursson verður ekki með sínu liði í næsta leik í Olís deild karla en Aganefnd Handknattleikssambands Íslands hefur dæmt hann í eins leiks bann. Þetta kemur fram á heimasíðu HSÍ.

Leó Snær fékk rautt spjald í lok leiks Selfoss og Stjörnunnar í Hleðsluhöllinni í Iðu á sunnudaginn. Leó braut þá á Selfyssingnum Elvari Erni Jónssyni sem var að reyna að skora yfir allan völlinn áður en leiktíminn rann út.

Leó Snær fékk líka dæmt á sig vítakast. Einar Sverrisson fór á vítalínuna en hann lét Sigurð Ingiberg Ólafsson verja frá sér og Stjörnumenn unnu eins marks sigur.

Brotið þótti það gróft leikbrot að mati Aganefndar HSÍ að Leó Snær fær eins leiks bann. Leó Snær Pétursson hafði fyrir þetta brot hvorki fengið gult spjald né brottvísun í ellefu leikjum með Stjörnunni í Olís deild karla.

Það má sjá brotið hans Leó hér fyrir neðan eftir 1:10 í myndbandinu sem er frétt um leikinn úr íþróttafréttum Stöðvar tvö.

Hér fyrir neðan má sjá úrskurð Aganefnd HSÍ í máli Leó Snæs:

„Leó Snær Pétursson leikmaður Stjörnunnar hlaut útilokun með skýrslu vegna grófs leikbrots í leik Selfoss og Stjörnunnar í mfl. ka. þann 2.12. 2018. Dómarar meta að brotið falli undir reglu 8:5 c) en þar sem brotið á sér stað á seinustu þrjátíu sekúndum leiksins er vísað til reglu 8:10 d). Með tilvísun í 10. gr. reglugerðar HSÍ um agamál er það niðurstaða aganefndar að leikmaðurinn er úrskurðaður í eins leiks bann. Aganefnd vekur jafnframt athygli á stighækkandi áhrifum leikbanna, skv. 1. mgr. 11. gr. sömu reglugerðar.“

Valsmaðurinn Alexander Örn Júlíusson fékk rautt spjald í upphafi leiks Vals og Hauka í gær en hann var ekki dæmdur í bann.

„Með tilvísun í 10. grein reglugerðar HSÍ um agamál er það því niðurstaða aganefndar að ekki skuli aðhafst frekar vegna málsins en vakin er þó athygli á stighækkandi áhrifum útlokana vegna slíkra brota,“ segir um mál Alexanders.