Hjúkrunarfræðingahnappur vekur athygli Costco-gaursins

Ef þeir sem liggja á Borgarspítalanum þurfa aðstoð geta þeir kallað til hjúkrunarfræðing með því að ýta á þar til gerðan hnapp. Svo ekkert fari á milli mála á hvern er kallað er það sýnt með myndrænum hætti. Ekki verður betur séð en sú mynd ýti undir staðalímynd þá sem fer fyrir brjóstið á sumum hjúkrunarfræðingum. Myndin sýnir kvenkyns hjúkrunarfræðing með kappa og í stuttu pilsi.

Myndin við hnappinn vekur mikla athygli

Sigurður Sólmundarson múrari, sem betur er þekktur sem Costco-gaurinn, liggur nú á Borgarspítalanum eftir að hafa lent í árekstri. Vísir ræddi við Sigurð á dögunum en hann er brotinn á báðum fótum, úlnliður er brotinn og hann allur krambúleraður og bólginn. Hann var heppinn að sleppa lifandi en allt jólahald á þeim bænum er í uppnámi.

Sigurður heldur vinum sínum á Facebook upplýstum um stöðu mála en eitt af því sem vakti athygli hans á spítalanum er téður hnappur. Hann birti ljósmynd af honum og myndinni sem auðkennir hnappinn. Sú mynd hefur vakið nokkra athygli og verið deilt um víðan völl á netinu. Undir myndinni eru fjörlegar umræður, ýmsum þykir þetta skjóta skökku við og þar er meðal annars sagt: „Og svo brjálast allir út í Birgittu þegar hún teiknar hjúkkurnar í kjól og með kappa“.

 

Hnappurinn gæti ýtt undir skaðlega staðalímynd

Myndin kallast á við eitt af mörgum sérstæðum fréttamálum ársins; en sumir hjúkrunarfræðingar urðu gramir vegna myndar sem dregin er upp af stéttinni í barnabók Birgittu Haukdal, Lára fer til læknis. Þeim finnst heldur lítið gert úr hinu mikilvæga starfi hjúkrunarfræðinga; sá hjúkrunarfræðingur sem kemur við sögu er kallaður hjúkrunarkona og myndin í bókinni er nánast eins og sú mynd sem notuð er til að auðkenna hnappinn sem sjúklingar ýta á vilji þeir kalla til hjúkrunarfræðing sér til aðstoðar.

Uppfært 11:00

Anna Sigrún Baldursdóttir er aðstoðarmaður forstjóra Landspítalans og Vísir bar þetta undir hana, hvort þessir hnappar gætu ekki reynst stórskaðlegir þegar litið er til ímyndar hjúkrunarfræðingar?

Anna Sigrún gaf nú ekki mikið fyrir það í sjálfu sér en segir að fyrst beri til þess að líta að það séu ekkert endilega hjúkrunarfræðingar sem svari þessari tilteknu bjöllu heldur líklegra að um sé að ræða sjúkraliða. Og þar sé stór hópur karla. Hún segir að þetta séu gamlir hnappar og úreltir. Kallkerfið sé orðið mjög gamalt, eins og ýmislegt annað á spítalanum.

Kallkerfi komið til ára sinna

„Við skiptum þessu út eins og efni standa til og leggjum áherslu á að birtingarmynd af starfsfólki sé í samræmi við raunveruleikann og þessi er það nú ekki.“

Anna Sigrún bendir á að á nýjum hnöppum birtist allt önnur mynd sem er meira í takti við það sem gerist og gengur í þessum efnum. Hún segir að birtingarmynd gömlu hnappanna sé ekki í takti við raunveruleikann. Og sú mynd sem til dæmis birtist af læknum; skeggjaður með bindi og í slopp, sé til að mynda á skjön við raunveruleikann dagsins í dag. Nú sé til dæmis staðan sú að nokkurn veginn jafn margir karlar og konur eru læknar við spítalann, þó það geti verið mismunandi milli deilda.