Hulunni svipt af jóla­kortum konungs­fjöl­skyldunnar

Meðlimir bresku konungsfjölskyldunnar hafa svipt hulunni af jólakortum sínum í ár en þar með talið er ný brúðkaupsmynd af Harry prins og eiginkonu hans Meghan.

Á myndinni sjást turtildúfurnar halda þétt utan um hvort annað á meðan þau horfa á flugeldasýningu í brúðkaupsveislu sinni en þau snúa baki í myndavélina.

Jólakort Vilhjálms prins og eiginkonu hans Katrínar er mynd af þeim hjónum með börnunum sínum þremur, þeim Georgi, Karlottu og Lúðvík.

Myndin er tekin í hausti að heimili þeirra í Norfolk en Lúðvík, sem er tæplega átta mánaða gamall, situr í fangi móður sinnar á meðan Karlotta stendur á milli foreldra sinna og Georg bregður á leik á bak við pabba sinn.

Karl Bretaprins og kona hans Camilla völdu svo mynd á sitt jólakort sem sýnir þau sitja á bekk og líta hlýlega til hvors annars en myndin er tekin í garði við Clarence House.