Fulltrúar SA og verkalýðsfélaganna þriggja boðaðir til fundar á mánudag

Fundi fulltrúa VR, Eflingar og Verkalýðsfélags Akraness með fulltrúum Samtaka atvinnulífsins sem hófst í húsakynnum Ríkissáttasemjara klukkan 10 lauk upp úr klukkan tólf. Boðað hefur verið til fundar á mánudag.

Halldór Benjamín Þorbergsson, formaður Samtaka atvinnulífsins, yfirgaf fundinn á undan fulltrúum verkalýðsfélagsins sem ræddu málin aðeins lengur við Bryndísi Hlöðversdóttur ríkissáttasemjara. Halldór hafði ekki margt að segja fréttamanni Stöðvar 2 að fundi loknum.

Hljóðið í forsvarsmönnum verkalýðsfélaganna þriggja var nokkuð þungt að fundi loknum. Nánar verður rætt við þá á Vísi í dag.

Ragnar Þór Ingólfsson, formaður VR, sagði fyrir fundinn að yrði enginn árangur af fundinum í dag teldi hann líklegt að viðræðunum yrði slitið.