Bein útsending: Verðmætasköpun og þjóðarhagur

Landsvirkjun býður til opins fundar klukkan 8:03-10 á Hilton í dag. Þar verður kynnt ný skýrsla um Orkuauðlindir Íslendinga og hagsæld til framtíðar eftir hagfræðingana Gunnar Haraldsson hjá Intellecon og Magnús Árna Skúlason hjá Reykjavík Economics.

Leitast verður að svara eftirfarandi spurningum: 

Hvernig fást sem mest verðmæti úr orkuauðlindum Íslands?

Hvar stendur íslenskur raforkumarkaður í alþjóðlegum samanburði?

Hvernig er viðskiptum með raforku til stórnotenda háttað og hver eru tækifærin til framtíðar?

Í upphafi fundarins munu þeir Magnús Árni og Gunnar kynna skýrsluna sem er aðgengileg á vef Landsvirkjunar.

Í greiningu þeirra kemur m.a. fram að íslenskur orkumarkaður er, þrátt fyrir landfræðilega einangrun, ekki einangraður í þeim skilningi að aðstæður á orkumörkuðum heimsins hafi ekki áhrif hér á landi.

Sé rétt á málum haldið bendir flest til að nýting íslenskra orkuauðlinda geti haft í för með sér myndun auðlindaarðs og gæti sá arður orðið töluverður í þjóðhagslegu samhengi. Fjölmargar spurningar vakna um hvernig best sé að verja slíkum auðlindaarði. Hið þjóðhagslega markmið hlýtur að vera að hámarka arð af orkuauðlindunum.

Valur Ægisson og Dagný Ósk Ragnarsdóttir frá viðskiptagreiningu Landsvirkjunar munu fara yfir alþjóðlega samkeppni íslensks raforkuiðnaðar og ný tækifæri á stórnotendamarkaði. 

Að lokum verða pallborðsumræður þar sem Magnús Árni Skúlason, Gunnar Haraldsson og Stefanía G. Halldórsdóttir, framkvæmdastjóri markaðs- og viðskiptaþróunar Landsvirkjunar sitja fyrir svörum.