WOW air sér fram á tug­prósenta far­þega­fækkun

Skúli Mogensen, stofnandi WOW air, áætlar að flugfélag sitt muni flytja rúmlega 2 milljón farþega til á þriðja tug áfangastaða árið 2019. Er það umtalsverð fækkun frá nýliðnu ári þegar WOW Air flutti um 3,5 milljónir farþega, sem er mesti fjöldi í rúmlega 6 ára sögu flugfélagsins.

Í ávarpi sem birtist í auglýsingu sem fylgdi vikublaðinu Mannlífi í morgun, þakkar Skúli viðskiptavinum WOW fyrir stuðninginn sem honum og starfsmönnum fyrirtækisins hefur borist í umróti síðustu vikna. Óþarfi er að rekja það í löngu máli; flugfélagið endurskipuleggur nú starfsemi sína, fækkar þotum um næstum helming, ræðst í uppsagnir og fækkun áfangastaða. Engu að síður segist Skúli líta „björtum augum til ársins 2019 þar sem við gerum ráð fyrir að flytja yfir 2 milljónir gesta til 26 áfangastaða.“

Sjá einnig: Taka lokahnykkinn í endurskipulagningu WOW air

Af þessari áætlun Skúla að dæma er ljóst að hin boðaða einföldun á rekstri WOW air mun endurspeglast í tugprósenta farþegafækkun. Í tilkynningu sem flugfélagið sendi frá sér í gær var greint frá því að WOW air hafi flutt 3,5 milljónir farþega í fyrra, sem nemur 24 prósent fjölgun frá fyrra ári. Í því samhengi var nefnt að í „júlí og ágúst ferðust hátt á 900 þúsund gestir með WOW air sem eru fleiri farþegar en allt árið 2015. Á tímabilinu maí til september flugu fleiri með WOW air en allt árið 2016.“

Sé miðað við að WOW sjái fram á að flytja tvær milljónir farþega á næsta ári nemur fækkunin á milli ára því rúmlega 40 prósentum. Örla fór á þessari fækkun strax í desember síðastliðnum, þegar WOW flutti 180 þúsund farþega. Það er 16 prósent fækkun frá sama mánuði árið áður.

Ávarp Skúla má lesa í heild sinni hér að neðan.

Kæru vinir, 

Ég vil byrja á að þakka fyrir þann mikla stuðning sem við höfum fengið úr öllum áttum undanfarnar vikur. Það hefur skipt sköpum að finna fyrir þeim meðbyr og velvilja sem ríkir gagnvart WOW air. Allt frá fyrsta degi var markmið okkar að byggja upp leiðandi lággjaldaflugfélag sem myndi lækka fargjöld til og frá Íslandi og veita hér öfluga samkeppni öllum til hagsbóta. Annað markmið var að kynna Ísland sem áfangastað og efla þar með ferðaþjónustuna í heild sinni. Að mörgu leyti hefur okkur tekist betur til en nokkurn óraði fyrir þegar við byrjuðum fyrir sjö árum síðan. Frá stofnun höfum við lækkað fargjöld til og frá Íslandi um tugi prósenta og kynnt áður óþekkt verð beggja vegna hafsins. Frá því að fyrsta flug var farið, 30. maí 2012, höfum við flogið með hátt í 10 milljónir gesta og þar af flugu yfir 4 milljónir til og frá Íslandi.

Eflaust má gagnrýna okkur fyrir að hafa vaxið of hratt og það er auðvelt að vera vitur eftir á. Það sem skiptir meira máli er að læra af mistökunum og þora að gera það sem gera þarf til að tryggja framtíð WOW air og byggja hér upp öflugt flugfélag og samkeppni til lengri tíma. WOW air flýgur einum yngsta flugflota í heimi sem er jafnframt einn sá sparneytnasti og umhverfisvænasti sem völ er á. Við búum yfir þéttum hópi rúmlega 1000 frábærra starfsmanna sem hafa mikla og einstaka reynslu í flugrekstri. Þetta er hópur sem vinnur vel saman og ég er afar stoltur af að fá að starfa með á hverjum degi. Undanfarnar vikur hafa verið mjög krefjandi en það er ánægjulegt að sjá hversu hratt aðstæður geta breyst til hins betra þegar allir leggjast á eitt. Við horfum björtum augum til ársins 2019 þar sem við gerum ráð fyrir að flytja yfir 2 milljónir gesta til 26 áfangastaða.

Takk kærlega fyrir að velja áfram WOW air og við hlökkum öll til að sjá ykkur um borð.



Með kærri kveðju,

Skúli Mogensen