Frakkarnir stöðvuðu Messi og félaga

Barcelona náði ekki að finna netmöskvana í kvöld er liðið gerði markalaust jafntefli við Lyon í fyrri leik liðanna í 16-liða úrslitum Meistaradeildarinnar.

Leikið var í Frakklandi í kvöld á Groupama-leikvanginum en Phillippe Coutinho þurfti að gera það sér til góðs að sitja á varamannabekknum í kvöld. Hann leysti svo Ousmane Dembele af hólmi á 67. mínutu.

Börsungar fengu heldur betur tækifærin til þess að skora og voru mun meira með boltann en náðu ekki að troða boltanum í netið. Þeir skutu alls tuttugu sinnum í átt að marki Frakkana en lokatölur 0-0.

Liðin mætast á nýjan leik um miðjan mars mánuð en Börsungar eru áfram með einvígið í sínum höndum fyrir síðari leikinn á Camp Nou.