Dómari sleginn niður í kvennaleik

Kvennalið Háskólans í Suður-Alabama í körfubolta spilaði gegn Coastal Carolina en allt varð vitlaust í leiknum þar sem körfuboltakonur slógust á körfuboltavellinum.

Myndband af atvikinu fór á flug á netinu en það sýnir Lady Jags-konur í Suður-Alabama stilla upp í sókn og vera yfir með níu stigum í fjórða leikhluta, þegar 5:39 voru eftir á klukkunni.

Svo má sjá Cordasiu Harris,  númer 22, úr Suður-Alabama, skiptast á orðum við Tracey Hueston, númer 13, úr Coastal Carolina.

Hueston snýr sér þá við til að sveifla hnefanum í átt að Harris en tekst ekki betur upp en að hún slær einn dómarann niður í leiðinni. Liðsfélagar Jaguars stukku samstundis upp af bekknum til að skilja þær að. Það má sjá þetta hér fyrir neðan.

Eftir atvikið voru Harris og Hueston reknar út úr húsi. Að auki voru sex aðrir leikmenn Lady Jags reknir út úr húsi fyrir að yfirgefa bekkinn á meðan leik stóð.

Annar dómari virtist hafa slasast í átökunum og þurfti á læknisaðstoð frá þjálfurum að halda.

Dómarinn sem var sleginn niður heitir Marla Gearhar en hún lá lengi í gólfinu og sneri ekki aftur til að dæma leikinn.

Íþróttastjóri Háskólans í Suður-Alabama gaf út yfirlýsingu í kjölfar slagsmálanna. Að sögn íþróttastjórans, dr. Joel Erdmann, munu leikmennirnir Amyah Suton, Daniela Gonzalez og Cordasia Harris ekki fá að spila í næsta leik liðsins.

„Háskólinn í Suður-Alabama líður ekki slagsmál undir neinum kringumstæðum. Atvikið sem átti sér stað í leiknum á miðvikudag er afar óheppilegt og óásættanlegt. Við munum nota þetta sem tækifæri til að læra og vaxa í viðleitni okkar til að verða betri í framtíðinni,“ segir í yfirlýsingunni.