Á meðal þeirra sem tók til máls var Þorsteinn Víglundsson, þingmaður Viðreisnar, sem sagði viðbrögð verkalýðshreyfingarinnar við tillögunum ekki hafa komið á óvart en verkalýðsleiðtogar hafa lýst reiði og sárum vonbrigðum með það sem kynnt var í gær.
Þorsteinn gagnrýndi ríkisstjórn fyrir það hvernig hún hefur haldið á málum í tengslum við kjaraviðræðurnar sem ríkið er ekki hluti af.
„Ríkisstjórnin hefur, allt frá því að hún tók við völdum, reynt að gera hlut sinn í lausn yfirstandandi kjaradeilu sem mestan. Það voru mistök. Með því hefur ríkisstjórnin undirbyggt miklar væntingar af hálfu forystu verkalýðshreyfingarinnar varðandi væntanlegt útspil. Vonbrigði forystu hennar koma því ekki á óvart,“ sagði Þorsteinn.
Hann sagði þó tillögur ríkisstjórnarinnar í skattamálum ekki með öllu ónothæfar. Tillögurnar væru áhugaverðar, vel mætt vinna með þær áfram og einnig skoða aðrar útfærslur sem kæmu tekjulægstu hópunum enn betur til góða.
Sagði ríkisstjórnina sitja með eggin í andlitinu
„Mistök ríkisstjórnarinnar eru mistök í væntingastjórnun. Það er ekki hlutverk ríkisstjórna að leiða kjaraviðræður eða ætla sér of stórt hlutverk við lausn þeirra. Ábyrgð á lausn kjaradeilna liggur alltaf fyrst og síðast hjá aðilum vinnumarkaðarins. Það má heldur ekki vera svo að stjórnmálaflokkar, hvort sem er í meirihluta eða minnihluta, séu að nýta sér kjaradeilur í pólitískum tilgangi. Þessi ríkisstjórn hefur ítrekað gert tilraun til að upphefja sig og mikilvægi sitt við lausn á þeirri stöðu sem uppi er á vinnumarkaði nú og situr með eggin í andlitinu eftir þá viðleitni,“ sagði Þorsteinn og minnti í lokin á að kjaradeilur ættu ekki mættu ekki lögum samkvæmt beinast að stjórnvöldum.„Kjaradeila sem beinist fyrst og fremst að Alþingi og ríkisstjórn en ekki að vinnuveitendum er pólitísk kjaradeila og sem slík brot á vinnulöggjöfinni. Það er líka ábyrgðarhluti af hálfu verkalýðshreyfingarinnar að fara fram með slíkum hætti.“
Nýja skattþrepið nákvæmlega það sem ríkisstjórnin hafði boðað
Ólafur Þór Gunnarsson, þingmaður Vinstri grænna, ræddi líka skattatillögur ríkisstjórnarinnar og annað sem boðað hefur verið í tengslum við kjaraviðræðurnar. Sagði hann leiðarstefið að allar breytingar sem gerðar væru á skatta- og bótakerfum kæmu þeim sem minna hafa á milli handanna best.„Það er réttlætismál og beinlínis gott fyrir samfélagið. Fólki líður betur í jafnari samfélögum og jafnara samfélag er betra samfélag fyrir alla,“ sagði Ólafur sem fór síðan yfir það sem ríkisstjórn Vinstri grænna, Sjálfstæðisflokks og Framsóknarflokks hefur gert og nefndi meðal annars hækkað frítekjumark vegna atvinnutekna elli- og örorkulífeyrisþega, hækkun greiðslna á Ábyrgðasjóð launa, hækkun grunnatvinnuleysisbóta og hækkun barnabóta.
„Hún hefur þyngt dagsektir tífalt vegna brota á lögum um vinnustaðaskírteini og eftirlit á vinnustöðum. Framlög til heilbrigðismála hafa verið stóraukin og byrjað að draga úr greiðsluþátttöku sjúklinga. Þar var byrjað á viðkvæmasta hópnum, öldruðum og öryrkjum. Þá eru boðaðar breytingar gegn félagslegum undirboðum, kennitöluflakki og mansali,“ sagði Ólafur Þór.
Hann sagði svo nýtt þrep í skattkerfinu fyrir tekjulága skref í rétta átt. Þá væri það nákvæmlega það sem ríkisstjórnin hefði boðað.
„[…] að þær aðgerðir sem ráðist yrði í í skattamálum yrðu til að lækka skattbyrði tekjulágra og lægri millitekjuhópa. Það færir íslenska skattkerfið í áttina að norrænu skattkerfunum frá flötum skattkerfum.“
