Segir gæðin aðeins munu aukast með innflutningi á fersku erlendu kjöti

Það myndi valda álitshnekki ef óheilbrigt kjöt berst hingað til lands, með því að flytja inn ferskt kjöt sé aðeins verið að bjóða upp á meiri gæði, ekki slá af heilbrigðiskröfum. Þetta segir Magnús Óli Ólafsson, forstjóri matvöruheildverslunarinnar Innness, í samtali við Fréttablaðið.

Fyrirtækið er þegar byrjað að setja sig í stellingar fyrir innflutning á fersku kjöti til landsins, en ef væntanlegt frumvarp Kristjáns Þórs Júlíussonar landbúnaðarráðherra verður að lögum má hefja innflutning í september næstkomandi.

„Það er eftirspurn á markaðnum eftir því. Ég held að við byrjum á því að f lytja inn nautakjöt, kjöt fyrir veitingamarkaðinn og steikur sem hafa ekki verið mikið í boði. Við erum þá að tala um vöru sem er í hærri gæðaflokki af því að hún er fersk,“ segir Magnús Óli.

Samkvæmt könnun Zenter rannsókna er meirihluti landsmanna á móti því að slakað verði á reglum um innflutning á ferskum matvælum. Hafa margir viðrað áhyggjur af því að fjölónæmar bakteríur berist til landsins í meiri mæli en áður. Hingað til lands er flutt inn mikið magn af frosnu kjöti, nam það tæplega þremur þúsundum tonna í fyrra, sem var þó talsverður samdráttur frá því árinu áður.

Þórunn Rafnar Þorsteinsdóttir, doktor í líffræði, sagði í samtali við Fréttablaðið í gær að frysting hefði engin áhrif á fjölónæmar bakteríur, það eina sem 30 daga frystiskyldan gerði væri að minnka magn kampýlóbakter, bakteríu sem finnst helst í alifuglakjöti og drepst þegar kjötið er fulleldað. Hún tók það jafnframt fram að aukinn innflutningur í sjálfu sér auki líkurnar á að fjölónæmar bakteríur berist í mannfólk.

Magnús Óli segir erfitt að sjá fyrir hvort innflutningur á kjöti muni aukast eða hvort ferska kjötið komi að einhverju leyti í staðinn fyrir það frosna.

„Svo eigum við líka eftir að sjá hvað innanlandsmarkaðurinn gerir, þeir hafa áfram tollverndina. Það er spurning hvort þeir muni leggja meiri áherslu á að mæta eftirspurn eða hvort þeir leggi meiri áherslu á mjólkurafurðir til að flytja út.“

Varðandi heilbrigðissjónarmiðin segir Magnús Óli alltaf þurfa að tryggja að matvara uppfylli öll skilyrði. „Ég get bara talað fyrir okkur, en við stundum bara viðskipti við viðurkennda aðila og það myndi valda álitshnekki ef kjötið uppfyllir ekki öll heilbrigðisskilyrði.“

Hann gagnrýnir málflutning þeirra sem tala fyrir því að hefta innflutning, það sé ekki verið að slá af neinum heilbrigðiskröfum, aðeins sé verið að bjóða landsmönnum upp á meiri gæði.

„Það er talað sýknt og heilagt um að loka landinu en á sama tíma er verið að bjóða ferðamönnum að skoða tómataræktun og inn á bóndabæi til að skoða búfénað. Það er enginn að spyrja hvar viðkomandi var í gær. Nú rís upp hópur af fólki með áhyggjur af innflutningi á kjöti. Ef áhyggjurnar eru svona miklar af hverju er þá ekki gripið til fyrirbyggjandi aðgerða til að koma í veg fyrir smit af völdum ferðamanna?“