„Lovísa er langbesti leikmaðurinn í þessari deild“

Valur er nýkrýndur bikarmeistari í handbolta kvenna og í fyrsta deildarleiknum eftir bikarhelgina unnu Valskonur öruggan sigur á Haukum.

Einn leikmaður sem hefur heldur betur stigið upp fyrir Val er Lovísa Thompson. Sérfræðingar Seinni bylgjunnar á Stöð 2 Sport ræddu Lovísu í þætti gærkvöldsins.

„Sko. Lovísa Thompson er svo lang besti leikmaðurinn í þessari deild,“ sagði Jóhann Gunnar Einarsson ákveðinn.

„Í bikarhelginni, Valskonur voru ekkert frábærar í sókn. Það fór allt í gegnum hana. Hún var með ég veit ekki hvað margar stoðsendingar inn á línuna og byrjaði margar árásir sem svo bjuggu til færi fyrir aðra.“

Gunnar Berg Viktorsson var ekki alveg jafn yfirlýsingaglaður en hældi þó Lovísu.

„Mér fannst hún til að byrja með ekkert sérstaklega góð en mér finnst hafa verið mikill stígandi í henni. Greinilega eru æfingarnar að skila sér.“

Alla umræðuna um kvennadeildina úr þætti gærkvölldsins má sjá hér að neðan.