Ekkert fararsnið á Atla Ævari

Atli Ævar Ingólfsson hefur skrifað undir nýjan tveggja ára samning við Selfoss.

Atli Ævar gekk í raðir Selfoss 2017. Á síðasta tímabili var hann í lykilhlutverki hjá Selfyssingum sem töpuðu fyrir FH-ingum í oddaleik um sæti í úrslitum um Íslandsmeistaratitilinn.

Í vetur skoraði Atli Ævar 81 mark í Olís-deildinni. Selfoss endaði í 2. sæti deildarinnar og mætir ÍR í 8-liða úrslitum úrslitakeppninnar um Íslandsmeistaratitilinn.

Eftir að hafa orðið Íslandsmeistari með HK 2012 hélt Atli Ævar út í atvinnumennsku. Þar lék hann með SönderjyskE og Nordsjælland í Danmörku og Eskilstuna Guif og Sävehof í Svíþjóð.