Golf

Hoppaði út í tjörn eftir að hún vann fyrsta risatitil sinn í golfinu

Óskar Ófeigur Jónsson skrifar
Jin Young Ko var heldur betur kát eftir sigurinn í nótt.
Jin Young Ko var heldur betur kát eftir sigurinn í nótt. Getty/Matt Sullivan
Hin suðurkóreska Jin Young Ko spilaði betur en allir á ANA Inspiration risamótinu í golfi og tryggði sér í nótt þar með sinn fyrsta risatitil á ferlinum.

Sigur Jin Young Ko á ANA Inspiration mun skila henni upp í fyrsta sæti heimslistans þegar hann verður gefinn út næst.





Jin Young Ko talaði um það fyrr á árinu að hún ætlaði sér að vera glaðasti spilarinn á golfvellinum og það er ekki hægt að segja en að sú gleðitaktík sé að skila sér.

„Ég trúi þessu ekki ennþá. Ég er rosalega ánægð,“ sagði Jin Young Ko eftir sigurinn.

„Ég reyni bara að einbeita mér að spilamennsku minni inn á golfvellinum. Það skiptir ekki máli hvar ég er á heimslistanum. Ég er ekki hrifinn af númerum eins og númer eitt eða númer tvö. Fyrir mér snýst þetta bara um að spila golf,“ sagði Jin Young Ko.

Jin Young Ko er 23 ára gömul og besti árangur hennar á risamóti fyrir helgina var annað sætið á opna breska mótinu árið 2015. Hún hefur því verið lengi í fremstu röð þrátt fyrir að vera ekki eldri.





Jin Young Ko var með eins höggs forskot fyrir lokadaginn á löndu sína In-Kyung Kim sem síðan gaf eftir á lokadeginum. Jin Young Ko spilaði hins vegar á tveimur höggum undir pari og endaði mótið á tíu höggum undir pari.

Hún var þremur höggum á undan annarri löndu sinni, Lee Mi-hyang, og fjórum höggum á undan hinni bandarísku Lexi Thompson sem varð þriðja.





Jin Young Ko lék hringina á 69, 71, 68 og 70 og þetta var því mjög jöfn spilamennska hjá henni. Par vallarins er 72 högg þannig að hún var undir parinu alla fjóra dagana.

Jin Young Ko fékk 450 þúsund Bandaríkjadala í verðlaunafé eða tæpar 54 milljónir íslenskra króna. Hún fagnaði sigrinum með því að hoppa út í eina tjörnina á Mission Hills golfvellinum í Kaliforníu. Hún tók því við bikarnum í sloppi. Stökkið má sjá hér fyrir neðan en það tók hún með kylfusveini sínum.















Golf

Mest lesið


Fleiri fréttir

Sjá meira


×

Mest lesið