Valur frumsýnir nýja búninginn með flottu myndbandi

Valur frumsýndi í dag búningana sem karla- og kvennalið félagsins í fótbolta munu spila í á komandi tímabili.

Valur birti flott myndband þar sem leikmenn karla- og kvennaliðsins sjást í nýju búningunum.

Við kynnum Valsbúninginn 2019! #valurfotbolti#ksi#pepsimaxdeildin#fotboltinet#ruvithrottir#visirsport#macron#origo#bosepic.twitter.com/mNyJcBIXYP

— ValurFotbolti (@Valurfotbolti) April 25, 2019

Aðalbúningurinn er hefðbundinn; rauð treyja, hvítar stuttbuxur og bláir sokkar. Valur fer hins vegar nýja leið með varabúninginn sem er grænn og svartur.

Macron framleiðir búninga Vals eins og síðustu ár. Hins vegar er komin ný auglýsing framan á búninginn, frá BOSE sem er einn af aðal samstarfsaðilum knattspyrnudeildar Vals.

Val var spáð Íslandsmeistaratitlinum í Pepsi Max-deild karla í árlegri spá fyrirliða, þjálfara og forráðamanna liðanna í deildinni. Valsmenn mæta Víkingum í 1. umferð deildarinnar annað kvöld.

Fyrsti leikur kvennaliðs Vals er gegn Þór/KA föstudaginn 3. maí.