Blikar spila næsta heimaleik sinn á heimavelli Fylkis

Blikarnir fara í lautarferð í Árbæinn á föstudagskvöldið í stað þess að fá Víkinga í heimsókn sín í Smárann.

Knattspyrnusamband Íslands hefur tilkynnt um breytingar á einum leik í Pepsi Max deild karla og tveimur í Pepsi Max deild kvenna vegna framkvæmda á Kópavogsvelli.

Verið er að setja gervigras á Kópavogsvöllinn og hann er ekki enn þá tilbúinn.

Leikur Breiðabliks og Víkings í karladeildinni hefur verið færður fram um einn dag og á annan völl.  Þá hefur leikjum Breiðabliks og Keflavíkur í kvennadeildinni verið víxlað.

Blikar spilar því einn af ellefu heimaleikjum sínum í Pepsi Max deild karla í sumar utan Kópavogs.

Leikur Breiðabliks og Víkings í 3. umferð Pepsi Max deild karla hefur verið færður af laugardeginum fram á föstudagskvöldið. Hann fer líka fram á Würth vellinum í Árbæ sem er heimavöllur Fylkismanna.

Blikar spilar því tvo leiki á Fylkisvellinum í sumar því þeir mæta Fylkismönnum á vellinum í 8. umferð, 14. júní næstkomandi. 

Víkingar gátu ekki skipt um leikvöll við Blika því þeir eru eins og Blikar að bíða eftir að sinn gervigrasvöllur verði tilbúinn í Víkinni. Fyrsti heimaleikur Víkinga var á móti FH í gær og fór hann fram á gervigrasvelli Þróttara í Laugardalnum. 



Vegna framkvæmda á Kópavogsvelli hefur eftirfarandi leikjum verið breytt:

Pepsi Max deild karla

Breiðablik – Víkingur R

Var: Laugardaginn 11. maí kl. 14.00 á Kópavogsvelli

Verður: Föstudaginn 10. maí kl. 20.00 á Würth vellinum

Jafnframt er neðangreindum heimaleikjum í Pepsi Max deild kvenna víxlað:

Pepsi Max deild kvenna

Breiðablik – Keflavík

Var: Mánudaginn 13. maí kl. 19.15 á Kópavogsvelli

Verður: Mánudaginn 13. maí kl. 19.15 á Nettóvellinum

(Leikurinn heitir því Keflavík – Breiðablik)

Pepsi Max deild kvenna

Keflavík - Breiðablik

Var: Laugardaginn 27. júlí kl. 14.00 á Nettóvellinum

Verður: Laugardaginn 27. júlí kl. 14.00 á Kópavogsvelli

(Leikurinn heitir því Breiðablik - Keflavík)