Íslandsmeistarar hafa ekki byrjað verr í sjö ár og það ætti að þýða eitt

Valsmenn eru fyrstu Íslandsmeistararnir í sjö ár sem ná ekki að vinna leik í fyrstu tveimur umferðunum. Þeir þurfa nú að endurskrifa söguna ætli þeir að vinna Íslandsmeistaratitilinn þriðja árið í röð.

Valsliðið tapaði 1-0 fyrir KA á Akureyri í gær og slapp með 3-3 jafntefli á móti Víkingum á heimavelli í fyrstu umferð. Í viðbót við það þá datt Valsliðið einnig út úr 32 liða úrslitum Mjólkurbikarsins.

Það þarf að fara aftur til ársins 2012 til að finna Íslandsmeistara sem náðu ekki að vinna leik í tveimur fyrstu umferðunum.

KR fékk aðeins eitt stig í fyrstu tveimur umferðunum í titilvörn sinni fyrir sjö árum og sat í 8. sæti deildarinnar með markatöluna 4-5 eftir tvær umferðir. KR-ingar enduðu síðan í fjórða sæti.

Ári áður, sumarið 2011, þá fengu ríkjandi Íslandsmeistarar Breiðabliks ekkert stig í fyrstu tveimur umferðunum og sátu á botni deildarinnar eftir þessar tvær umferðir með markatöluna 3-7. Blikar enduðu í sjötta sætinu í deildinni um haustið 20 stigum á eftir Íslandsmeisturum KR.

Eins og sjá má hér fyrir neðan þá er Valur fjórtánda Íslandsmeistaraliðið sem nær ekki að vinna leik í fyrstu tveimur umferðunum í titilvörn sinni frá því að deildin varð fyrst skipuð tíu liðum árið 1977.

Það vekur vissulega athygli að engir meistarar sem hafa byrjað svona illa hafa staðið uppi sem Íslandsmeistarar um haustið. Það er því ljóst að Valsmenn geta skrifað söguna takist þeim að reka af sér slyðruorðið og vinna titilinn.



Íslandsmeistararlið án sigurs í fyrstu tveimur umferðunum árið eftir:

(Í nútíma fótbolta 1977-2019)

Valur 2019 - ???

KR 2012 - 4. sæti í lok móts

Breiðablik 2011 - 6. sæti

KR 2004 - 6. sæti

ÍA 2002 - 5. sæti

ÍA 1997 - 2. sæti

Fram 1991 - 2. sæti

KA 1990 - 8. sæti

Valur 1988 - 2. sæti

Valur 1986 - 2. sæti

Víkingur 1983 - 7. sæti

ÍBV 1980 - 6. sæti

Valur 1979 - 3. sæti

Valur 1977 - 2. sæti