Ólafur hefur aðeins náð í eitt stig í Krikanum sem þjálfari Vals

Óskar Ófeigur Jónsson skrifar 20. maí 2019 16:30

Ólafur Jóhannesson og Bjarni Ólafur Eiríksson fagna sigri eftir síðast leik í Árbænum vísir/daníel

Ólafur Jóhannesson var fyrsti maðurinn til að gera FH-liðið að Íslandsmeisturum en það hefur lítið gengið hjá honum í heimsóknum hans í Kaplakrika síðan þá. Ólafur og lærisveinar hans fá tækifæri til að breyta út frá þeirri venju í kvöld.

Íslandsmeistarar Valsmanna mæta í kvöld í Kaplakrika þar sem þeir spila við FH-inga í 5. umferð Pepsi Max deild karla. Valsmenn unnu sinn fyrsta sigur í sumar í síðustu umferð og geta með sigri komist sex stigum á eftir toppliði ÍA.

Leikur FH og Vals hefst klukkan 19.15 og verður í beinni útsendingu á Stöð 2 Sport.

Kaplakriki hefur ekki verið uppáhaldsstaður Valsmanna síðasta áratuginn enda hefur liðið ekki unnið í Hafnarfirðinum í tólf ár.

Valsliðið hefur aðeins náð í eitt stig af tólf mögulegum á Kaplakrikavelli síðan að Ólafur Jóhannesson tók við liðinu fyrir 2015 tímabilið.

Ólafi hefur hingað til ekki tekist að yfirbuga Kaplakrika grýluna sem herjast hefur á Hlíðarendapilta í meira en áratug.

Eina stigið kom í 1-1 jafntefli í þriðju síðustu umferð haustið 2016 en stigið nægði FH-ingum til að verða Íslandsmeistarar daginn eftir þegar Blikum tókst ekki að vinna sinn leik.

Valsmenn unnu síðast sigur á FH í Kaplakrika 23. september 2007 en 2-0 sigur Hlíðarendaliðsins var lykilsigur þegar Valsmenn tryggðu sér Íslandsmeistaratitilinn þetta haust.

Síðan þá hafa Valsmenn aðeins náð í samtals 3 stig út úr ellefu deildarleikjum sínum á Kaplakrikavelli en FH-ingar hafa fengið 27 stig út úr þessum sömu leikjum.

Leikir Valsmanna í Kaplakrika undir stjórn Ólafs Jóhannessonar 2015-2018:

2018 - 0 stig (1-2 tap)      [Valur Íslandsmeistari]

2017 - 0 stig (1-2 tap)      [Valur Íslandsmeistari]

2016 - 1 stig (1-1 jafntefli)      [FH Íslandsmeistari]

2015 - 0 stig (1-2 tap)     [FH Íslandsmeistari]

Leikir Valsmanna í Kaplakrika 2007-2014:

2014 - 0 stig (1-2 tap)

2013 - 1 stig (3-3 jafntefli)

2012 - 0 stig (1-2 tap)          [FH Íslandsmeistari]

2011 - 0 stig (2-3 tap)

2010 - 1 stig (1-1 jafntefli)

2009 - 0 stig (0-2 tap)        [FH Íslandsmeistari]

2008 - 0 stig (0-3 tap)        [FH Íslandsmeistari]

2007 - 3 stig (2-0 sigur)         [Valur Íslandsmeistari]

Pepsi Max-deild karla

Mest lesið

Fleiri fréttir