KA-maður og Þórsari berjast um fyrstu pylsuna þegar Bæjarins beztu opna á Akur­eyri

Hallgrímur Jónasson, KA-maður, og Þórsarinn Jóhann Hannesson munu berjast um fyrstu pylsuna þegar Bæjarinz bestu pylsur opna í fyrsta sinn á Akureyri.

Staðurinn opnar á Ráðhústorginu klukkan 13 á morgun, laugardag, að sögn Guðrúnar Kristmundsdóttur, eiganda Bæjarins beztu.

Þetta er í fyrsta sinn sem Bæjarins beztu opna úti á landi en nokkrir staðir eru á höfuðborgarsvæðinu, þeirra þekktastur án efa vagninn í Tryggvagötu.

Guðrún segir að svipaður vagn hafi verið smíðaður fyrir staðinn og á Akureyri og var hann fluttur norður í nótt.

Barði Jónsson, Akureyringur, og fjölskylda kemur til með að reka staðinn.

„Hann hafði fyrst samband fyrir nokkrum árum þannig að þetta er búið að vera lengi í bígerð,“ segir Guðrún.

Opnunartíminn verður frá 11 til 20 og næturopnun um helgar.

„Við ætlum að halda þessu svolítið opnu og sjá hvernig þetta þróast, eins og við höfum gert með alla staðina okkar. Við höfum líka alltaf haft það þannig að þótt það sé ekki mikið að gera klukkan 11 á morgnana þá er þetta bara þjónusta sem er í boði,“ segir Guðrún.