HK í öðru sæti yfir besta árangurinn í síðustu fimm leikjum

HK-ingar unnu í gær 2-0 sigur á FH-ingum í Kórnum og fögnuðu þar með þriðja sigri sínum í röð í Pepsi Max deild karla í fótbolta.

HK-liðið er nú komið með 17 stig í deildinni og er í áttunda sæti deildarinnar þegar þrettán umferðir eru af baki.

HK-ingar fengu samt aðeins fimm stig út úr fyrstu átta leikjum sínum í sumar og sátu þá í fallsæti eftir 2-1 tap á móti Víkingum í sannkölluðum sex stiga leik 14. júní síðastliðinni.

Brynjari Birni Gunnarssyni, þjálfara HK og aðstoðarmönnum hans tókst þá að snúa við blaðinu og sjálfstraust HK-liðsins hefur vaxið með hverjum leiknum að undanförnu.

HK vann 2-0 útisigur á ÍA í slag nýliðanna í næsta leik og hefur nú unnið fjóra af síðustu fimm leikjum sínum. Liðið hefur einnig unnið Breiðablik, KA og nú síðast FH.

Aðeins leikurinn á móti Val tapaðist en þar voru HK-ingar yfir í 25 mínútur og fengu á sig sigurmark á fimmtu mínútu í uppbótatíma.

Það er aðeins topplið KR sem hefur náð í fleiri stig í síðustu fimm leikjum sínum af liðum Pepsi Max deildarinnar og Vesturbæingar hafa aðeins einu stigi meira en HK á þessum tíma.

HK er líka með plús fimm mörk í markatölu á þessum tíma og eru þar með bestu markatöluna ásamt KR-liðinu. Hér fyrir neðan má sjá bestan árangur liðanna í undanförnum fimm leikjum sínum.

Besti árangur liða í Pepsi Max deild karla í síðustu fimm leikjum:

1. KR 13 stig (Markatala: +5)

2. HK 12 stig (+5)

3. Valur 10 stig (+3)

4. Stjarnan 8 stig (+4)

5. Fylkir 7 stig (-2)

6. FH 7 stig (-1)

7. Breiðablik 7 stig (+1)

8. Víkingur 6 stig (0)

9. ÍA 6 stig (0)

10. Grindavík 4 stig (-1)

11. KA 1 stig (-5)

12. ÍBV 0 stig (-9)