FoodCo og Gleðipinnar sameinast

Með samruna veitingafyrirtækjanna FoodCo og Gleðipinna verður lögð meiri áhersla á gæði og hlúð betur að sérkennum og kjarna staðanna. Þetta kemur fram í viðtali Morgunblaðsins við Jóhannes Ásbjörnsson sem er einn fimm eigenda nýja félagsins.

FoodCo og Gleðipinnar reka samtals tíu veitingastaði sem eru flestum landsmönnum kunnugir. Staðirnir sem um ræðir eru Aktu-taktu, American Style, Blackbox, Eldsmiðjan, Hamborgarafabrikkan, Kaffivagninn, Pítan, Roadhouse, Saffran og Shake & Pizza.

Sjá einnig: Múlakaffi og Jói kaupa Blackbox

Að sögn Jóhannesar mun sameinaða félagið vera á pari við nokkur önnur veitingafyrirtæki, með um það bil fimm til sex prósenta hlutdeild af heildarmarkaðnum. Jóhannes segir fyrirtækin vera með ólíka styrkleika sem munu efla sameinaða félagið til muna.

FoodCo hefur mikla reynslu af rekstri veitingastaða og liggja styrkleikar Gleðipinna einna helst í markaðsmálum. Því lítur hann svo á að 1+1 verði 3 í þessari jöfnu.

Þá segist hann vera spenntur fyrir komandi tímum þar sem nú sé stefnt að því að efla bæði gæði matar og þjónustu hjá umræddum veitingastöðum og það verði vandað vel til verka. Samruninn muni jafnframt leiða til stjórnunarlegs hagræðis, vörumerkjunum til góðs.