HK sendi Georgíumanninn heim

Georgíski landsliðsmaðurinn Giorgi Dikhaminjia mun ekki spila með HK í vetur en félagið er búið að senda hann til síns heima.

Hann stóð engan veginn undir væntingum félagsins og var því lítið annað að gera en að losa sig við hann.

Elías Már Halldórsson, þjálfari liðsins, segir að félagið sé með alla anga úti til þess að finna mann í hans stöðu. Á meðal þeirra leikmanna sem HK er að reyna við er Pétur Árni Hauksson sem spilaði með ÍR í fyrra.

HK var spáð næstneðsta sætinu í Olís-deild karla af fyrirliðum, þjálfurum og forráðamönnum í gær.  Fyrsti leikur nýliðanna í deildinni í vetur er miðvikudaginn 11. september er liðið sækir Hauka heim.