Niðurstaða um áminningu liggur ekki fyrir

Dómsmálaráðherra hefur ekki útskýrt fyrir umboðsmanni Alþingis hvers vegna Haraldur Johannessen, ríkislögreglustjóri var ekki áminntur eftir að hann sendi tveimur fjölmiðlamönnum bréf á bréfsefni embættis hans, vegna máls er varðaði hans eigin hagi.

Öll spjót beinast að Haraldi Johannessen, ríkislögreglustjóra annarsvegar og Áslaugu Örnu Sigurbjörnsdóttur, dómsmálaráðherra, vegna mála sem tengjast honum og embættinu.

Það vekur athygli að nýskipaður dómsmálaráðherra hefur ekki svarað því beint hvort Haraldur njóti trausts hennar sem ríkislögreglustjóri. Hún hefur hins vegar sagt að hún treysti embættinu.

Þónokkur mál eru á borði dómsmálaráðherra um ríkislögreglustóra og um embættið. Mál er snerta einelti, rekstur embættisins, samskiptamál og bréfaskriftir Haraldar.

Varðandi bréf sem Haraldur skrifaði til tveggja blaðamanna, á bréfsefni embættisins, þá segir þáverandi dómsmálaráðherra að Haraldur hafi ekki verið áminntur vegna meðalhófsreglunnar.

Ráðning Hreins Loftssonar sem aðstoðarmanns nýs dómsmálaráðherra, og tilkynnt var um í dag, vekur einnig athygli. Hreinn var sum sé lögmaður annars blaðamannsins sem kvartaði undan framgöngu Haraldur vegna bréfskrifta.

Ámælisverð framkoma ekki ástæða til áminningar

Þáverandi dómsmálaráðherra, Þórdís Kolbrún Reykfjörð Gylfadóttir, komst að þeirri niðurstöðu í sumar að framganga Haraldar Johannessen, ríkislögreglustóra hafi verið ámælisverð þegar hann andmælti umfjöllun tveggja blaðamanna, vegna efnahagsbrotadeildar embættisins.

Hvers vegna var ekki farið í áminningarferli strax?

„Það var niðurstaða dómsmálaráðuneytisins á sínum tíma að með tilliti til meðalhófs og annarra þátta að þá var komist að þeirri niðurstöðu að þetta þætti ámælisvert og að hann yrði ekki áminntur vegna þessa,“ segir Þórdís.

Þegar þessi niðurstaða var ljós sendi Haraldur annað bréf, þar sem hann baðst velvirðingar, til mannanna tveggja einnig á bréfsefni embættis ríkislögreglustóra.

Núverandi dómsmálaráðherra hefur ekki svarað erindi umboðsmanns Alþingis.

„Það er í vinnslu og mun verða svarað á næstu dögum,“ segir Áslaug.

Dómsmálaráðherra segir að efnisleg niðurstaða við bréfi umboðsmanns liggi ekki fyrir.

Ráðuneytið hlýtur að vera búið að mynda sér afstöðu hvort það verði áminnt eða ekki?

„Það er í vinnslu. Ég get ekki tjáð mig um einstaka starfsmannamál,“ segir Áslaug.

Nær allir lögreglustórar landsins og Landssamband lögreglumanna hafa lýst yfir vantrausti á hann og treysta sér ekki til þess að vinna með honum.

Vinna sem dómsmálaráðherra hefur sett af stað varðandi breytingar í löggæslu í landinu miðar áfram en hún hefur nefnt að sameina eða samreka eigi embætti Ríkislögreglustjóra og embætti Lögreglustjórans á höfuðborgarsvæðinu. Þá er stutt þar til lögreglustjórinn á Austurlandi hættir störfum og ekki útilokað að það embætti verði sameinað öðru.

„Í næstu viku verða fundir með öllum lögreglustórum, aðilum sem koma að lögreglunni, ríkislögreglustjóra og fleirum varðandi þá vinnu sem ég hef sett af stað,“ segir Áslaug.

Dómsmálaráðherra og ríkislögreglustóri funduðu í byrjun síðustu viku. Eftir þann fund sagði ráðherra ástandið innan lögreglunnar óásættanlegt en vonaði að samtal hennar og Haraldar Johannessen myndi halda áfram.



Hefur þú rætt eitthvað við Harald Johannessen frá því þið hittust síðast?

„Nei,“ segir Áslaug.

Hvenær er næsti fundur boðaður?

„Það er enginn fundur sjáanlegur," segir Áslaug.

Þú vonast til þess að samtal ykkar myndi halda áfram. Hefur eitthvað efnislega farið fram á milli ykkar?

„Nei,“ segir Áslaug.