FH-ingar fagna stórafmæli

Við munum fagna afmælinu 26. október, þá verður dagskrá allan daginn. Þá munu deildir félagsins kynna starfsemi sína frá klukkan tvö til fjögur og að því loknu munum við taka í notkun nýtt knatthús sem við köllum Skessuna. Svo verður afmæliskvöldverður klukkan sjö í veislusalnum okkar Sjónarhóli,“ segir Viðar Halldórsson, formaður Fimleikafélags Hafnarfjarðar.

Félagið fagnar í dag 90 ára afmæli, en það var stofnað á þessum degi árið 1929. Nokkrir ungir fimleikadrengir tóku sig saman og stofnuðu félagið og voru fimleikar í upphafi eina íþróttagreinin sem stunduð var í FH. Síðan þá hefur bæst við fjöldi íþróttagreina sem iðkaðar eru í félaginu, svo sem frjálsar, handbolti, fótbolti og skylmingar en ekki eru lengur stundaðir þar fimleikar.

Um 1.000-1.500 manns leggja leið sína á FH-svæðið daglega og eru iðkendur félagsins um 2.000 talsins. „Þeir sem koma hingað eru á öllum aldri, alveg frá tveggja ára til níræðs. Það er skólastarfsemi hérna á morgnana og svo kemur hingað fjöldi eldri borgara á hverjum degi til þess að hreyfa sig. Svo eftir klukkan þrjú hefjast æfingar hjá öllum flokkum í öllum greinum,“ segir Viðar.

Hann bætir við að starfsemi íþróttafélaga hafi breyst mikið síðustu áratugina og þar sé FH engin undantekning. „Aðstaðan hjá okkur hefur gjörbreyst og þá sér í lagi síðan árið 2005. Við erum nú með frábæra aðstöðu, bæði íþróttasali, búningsklefa og annað sem er á um 25.000 fermetrum,“ segir Viðar.

„Svo erum við með útisvæði í hæsta gæðaflokki, bæði knattspyrnuleikvang og frjálsíþróttavöll. Ég geng svo langt að segja að við séum með glæsilegasta félagsíþróttasvæði landsins,“ segir hann.

Viðar segir FH-inga fagna þessum tímamótum og er hann sérstaklega þakklátur góðri samvinnu við Hafnarfjarðarbæ. „Íþróttastarfsemi, sama hvort hún er hér eða annars staðar, er stór hluti af samfélaginu,“ segir hann.

„Sem betur fer hafa sveitarfélögin tekið verulegan þátt í þessari starfsemi en ég hvet stjórnvöld til þess að hlúa betur að starfsemi íþróttafélaga, sama hvar þau eru á landinu,“ segir Viðar ákveðinn.