Desember er runninn upp, sá þriðji í dag og styttist í hátíð ljóss og friðar.
Vísir ætlar að gleðja lesendur sína með jóladagatali þar sem leitað verður í gullkistuna á sjónvarps- og útvarpsvefnum. Óhætt er að segja að þar sé hægt að gleyma sér við áhorf á gamalt og gott efni.
Hér að neðan má sjá eftirminnilegt innslag sem Ásgeir Erlendsson tók í Íslandi í dag árið 2015. Þar var Brynjar Níelsson alþingismaður sóttur heim en óhætt er að segja að honum bregði við svo til allt. Brauðristir, hávaxið fólk - bara nefna það.
„Þetta lýsir sér bara þannig að óvænt hljóð, jafnvel sem ég veit að eru að koma, ef þau koma snöggt þá kippist ég allur við. Það getur dugað að einhver hávaxinn labbi snöggt fram hjá mér,“ segir þingmaðurinn.
„Í verstu tilfellunum þá dett ég niður á hnén og eitt sinn þá datt ég í brauðrekkann í Bónus eftir að það var klappað á bakið á mér.“
Innslagið má sjá að neðan.
