Auðunn og Rakel skírðu soninn

Auðunn Blöndal og Rakel Þormarsdóttir hafa gefið syni sínum nafn. Drengurinn heitir Theodór Sverrir Blöndal og birtir Auðunn mynd af syninum ásamt þeim Sverri Bergmann söngvara og Sverri Þór Sverrissyni, eða Sveppa, á Instagram.

„Sverrir Bergmann, Sverrir Þór Sverrisson og Theodór SVERRIR Blöndal! Það er eins og þetta par hafi verið að ættleiða hann,“ skrifar Auðunn við myndina á Instagram þar sem má sjá þá félaga alsæla með nýja liðsmanninn í Sverris-genginu.

Auðunn var gestur Einkalífsins á Vísi í síðustu viku og tjáði sig um nýja hlutverkið. Hann sagðist njóta þess að vera pabbi og það hafi verið ótrúleg tilfinning að fá soninn í hendurnar í fyrsta sinn.

Sjá einnig: Það var kominn tími á nýjan kafla í mínu lífi

„Það er gaman að vera orðinn faðir og eiginlega bara ótrúlega. Hann er alveg geggjaður, en svolítið erfiður á nóttinni og er með einhverja magakveisu,“ segir Auðunn í þættinum.

„Ég fór bara að gráta þegar ég hélt þarna á honum. Þetta er eitthvað sem maður gleymir aldrei.“

Drengurinn kom í heiminn þann 14. nóvember og greindi Auðunn frá því á Instagram á sínum tíma að hann væri hamingjusamasti pabbi landsins, þó hann væri ekki svo viss um að hann væri sá elsti.