Búast við helmings tekjutapi fyrirtækja

Rúmlega 90 prósent forsvarsmanna fyrirtækja telja að tekjur muni minnka á öðrum ársfjórðungi, samanborið við sama ársfjórðung í fyrra, vegna heimsfaraldurs nýju kórónuveirunnar. Að meðaltali er áætlað að tekjutapið verði um 50 prósent. Þetta kemur fram í könnun sem Samtök Atvinnulífsins gerðu.

Þar kemur fram að um 90 prósent af íslenskum atvinnurekendum hafi gripið til hagræðingaraðgerða vegna ástandsins og var þar skert starfshlutfall starfsmanna algengasta aðgerðin. Niðurskurður annars rekstrarkostnaðar var næstur.

Tæplega sex þúsund uppsagnir hafa átt sér stað og þar af langstærstur hluti í ferðaþjónustu og flutningum. Um 24 þúsund manns eru komnir í skert starfshlutfall. Á vef SA segir að könnunin hafi verið gerð á tímabilinu 26. til 31. mars en umsóknir um hlutabætur hjá Vinnumálastofnun þann 3. apríl hafi verið um 30 þúsund. Það sýni hve hratt forsendur breytist degi til dags.

„Forsvarsmenn fyrirtækjanna voru spurðir um hversu lengi þeir teldu að áhrif COVID-19 muni vara á rekstur fyrirtækjanna. Flestir, eða 30 prósent, töldu áhrifin vara í þrjá til fjóra mánuði og fjórðungur taldi áhrifin standa í fimm til sjö mánuði. Allmargir, eða 29 prósent, töldu áhrifin vara lengur en tíu mánuði og að meðaltími áhrifanna er áætlaður 8 mánuðir,“ segir á vef SA.

Könnunin var lögð fyrir 1.803 forsvarsmenn fyrirtækja sem eiga aðild að SA. Svarhlutfall var 37 prósent því 674 svöruðu.