„Er rosalega mikil landsbyggðartútta“

Eva Laufey og nýi matarvagninn hennar ferðast um landið í sumar og hófst fjörið á laugardaginn.

Áfangastaðirnir verða sex talsins og mun Eva gefa bragðmiklar samlokur á hverjum stað.

Í Íslandi í dag á Stöð 2 á laugardaginn sagði hún áhorfendum frá þessum skemmtilega verkefni, þáttunum sem fara af stað í kjölfarið og fór yfir það hvernig hægt sé að reiða fram geggjaða grísasamloku í garðpartýum í sumar.

„Við ætlum að ferðast um Ísland og byrjum í Þorlákshöfn, svo í Höfn í Hornafirði, svo er það Egilsstaðir og Húsavík og þá förum við í smá pásu og tökum síðan seinni rúntinn í ágúst,“ segir Eva þegar Sindri Sindrason leit við hjá henni í matarvagninn í síðustu viku.

„Hugmyndin er að kynnast landinu, fólkinu þar og matnum. Á hverjum stað finn ég eitt hráefni sem er vinsælt þar og útbý samloku. Í Þorlákshöfn ætlum við að reiða fram grænmetissamloku þar sem við fáum pestó frá bændum þar, á Höfn í Hornafirði fáum við humar.“

Eva ætlar að kynna sér bæði matarmenninguna á stöðunum og líka þeirrar afþreyingar sem hægt er að prófa þar.

„Ég er rosalega mikil landsbyggðartútta og ég elska landsbyggðina, þar er svo rosalega margt spennandi.“

Eva er stödd í Höfn á Hornafirði núna og sökum veðurs verður hátíðin á Höfn í hádeginu á morgun.

Síðan verður hún á Egilsstöðum 17. júní og á Húsavík 19. júní.

Hér að neðan má sjá innslagið í heild sinni.